Disa ditë më parë Albin Kurti hoqi përkohësisht taksën ndaj Serbisë, duke i dhënë një afat kohor prej 90 ditësh për të njohur Pavarësinë e Kosovës.
Në të kundërt, Kurti deklaroi se taksa do rikthehej.
Ky vendim shkaktoi debate të shumta, ku i gjeturi mes vështirësive është padyshim kryeministri i Kosovës, i cili duhet të përballet me politikanë të ndryshëm, por jo vetëm, që kundërshtojnë vendimin e tij dhe nga ana tjetër me ndërkombëtarët, sidomos SHBA e cila nuk mbeti aspak e kënaqur me heqjen e taksës me kusht.
SHBA jo vetëm që nuk u kënaq nga heqja e taksës, por reagon ashpër ndaj Kurtit
Ndër reagimet më të ashpëra, ishte ai i ish-kryeministrit Ramush Haradinaj, i cili e cilësoi Kurtin si tradhëtar që iu bind serbëve.
Më herët ditën e sotme, lidhur me këto ngjarje ka reaguar kryeministri Edi Rama, i cili me anë të një statusi në Twitter, Rama iu kundërvu Haradinajt, duke shkruar se Kurti mund të jetë gjithçka, po kurrë shërbëtor i Serbisë!
Taksa ndaj Serbisë. Mes Haradinajt dhe Kurtit, ja cilën anë mban kryeministri Rama
Së fundmi, kryetari i Lidhjes Demokratike të Kosovës, Isa Mustafa, me anë të një statusi në Facebook i ka dalë kundër Albin Kurtit.
Ai ka thënë se taksa 100% ndaj produkteve të Serbisë dhe Bosnjë e Hercegovinës, duhet të hiqet ashtu siç kanë kërkuar Shtetet e Bashkuara të Amerikës, pasi sipas tij, kjo është në interes të Kosovës.
Statusi i plotë
Të nderuar qytetarë
Që nga fillimi jam shprehur haptas, ndoshta ndër të vetmit, se tarifa së pari 10 përqind e pastaj 100 përqind, e caktuar nga Qeveria Haradinaj, nuk kishte arsyetim ekonomik por ishte vënë për tu mbrojtur nga dështimet, sidomos në politikën e jashtme.
Presidenti i Serbisë, Vuçiq, i dha tarifës dimension të kushtëzimit të dialogut. Prandaj kur doli në pah mundësia e pazareve me territorin ndërmjet dy presidentëve, atij të Serbise dhe të Kosovës, tarifa rrëshqiti në levën e pengimit të këtij dialogu të dëmshëm. Atëherë e kam përkrahur ish Kryeministrin Haradinaj për vazhdimin e tarifës.
Pas zgjedhjeve të vitit të kaluar të Komisionit Evropian dhe sidomos pas angazhimit shumë aktiv të SHBA-ve me përfaqësuesin special të Presidentit Trump, ambasadorin Grenell, tarifa objejtivisht mbetet vetëm si relikt, i cili po i shërben Serbisë të paraqitet si viktimë në arenën ndërkombëtare dhe disave në Kosovë si mjet i vetëm i një kauze të paqendrueshme politike.
Askujt nuk i mbushet mendja se Kosova e detyron Serbinë që ta njohë përmes tarifës.
Por, shumicës dërmuese iu mbushet mendja se SHBA-të, në rend të parë, dhe BE mund ta bindin Serbinë, përmes procesit të dialogut, ta njohë shtetin e Kosovës.
Dëshiroj të besoj se mbledhja e nesërme e Kuvendit do ti japë përkrahje Qeverisë dhe Kryeministrit Kurti të hiqet tarifa.
Të hiqet ashtu siç po kërkojnë SHBA-të.
Nuk jam i sigurt që dikush nga grupet parlamentare ose deputetët e Kuvendit apo qeveritarët ta kenë gjetur një partner më të fortë, më meritor dhe më të përkushtuar sesa SHBA-të për shtetin dhe shtetësinë e Kosovës. E as një rrugë më me perspektivë se ajo e integrimit evropian dhe euroatlantik.
Nëse dikush luhatet, LDK, deputetët e saj dhe anëtarët e Qeverisë do të mbështesin pa asnjë rezervë dhe me besim e bindje të plotë heqjen e menjëhershme të tarifës, dhe atë jo vetëm se po e kërkon partneri ynë strategjik SHBA, por se jemi të bindur se kjo është në interes të shtetit të Kosovës.
Në qoftë se Serbia, nuk e ndal fushatën kundër Kosovës dhe nuk mënjanon pengesat tregtare dhe ekonomike, LDK mbetet e përkushtuar për aplikimin e masave të reciprocitetit pas një periudhe që Qeveria e akordon me SHBA-të dhe BE-në.
