Gisele Pelicot, gruaja franceze që tronditi opinionin publik me rrëfimin e saj për dhunimin e përsëritur për më shumë se një dekadë, është nderuar me titullin më të lartë civil të Francës. Ajo është shpallur Kalorëse e Legjionit të Nderit në prag të Ditës Kombëtare Franceze.
Sot 72 vjeç, Pelicot u bë simbol i guximit dhe mbijetesës pasi hoqi dorë nga anonimati për të dëshmuar në një proces të profilit të lartë kundër bashkëshortit të saj. Dominique Pelicot, gjithashtu 72 vjeç, u dënua me 20 vjet burg në dhjetor të vitit të kaluar, pasi pranoi se e kishte droguar sistematikisht bashkëshorten e tij dhe kishte lejuar rreth 50 burra ta përdhunonin atë ndërsa ajo ishte pa ndjenja në shtrat.
Pjesë e një liste me 589 të nderuar, Gisele Pelicot është vlerësuar për qëndrueshmërinë e saj morale dhe angazhimin për drejtësi. Ajo ndoqi thuajse çdo seancë të gjyqit, duke përballuar me dinjitet dhe forcë traumat që kishte përjetuar për më shumë se dhjetë vjet.
“Dua që të gjitha gratë që janë dhunuar të thonë: Zonja Pelicot ia ka dalë, mundem edhe unë”, është shprehur ajo më herët para gazetarëve. Me vendimin për ta bërë publik procesin gjyqësor, ajo u përpoq të ndryshonte perceptimin mbi turpin, duke e zhvendosur atë nga viktima tek dhunuesi.
Presidenti francez Emmanuel Macron ka lavdëruar figurën e saj, duke theksuar se “dinjiteti dhe kuraja e saj e kanë inspiruar Francën dhe botën”.
Avokatja e Gisele Pelicot ka bërë të ditur se një libër me detaje mbi përvojën tronditëse të saj pritet të publikohet në fillim të vitit të ardhshëm.
