Dy shqiptarë janë shpallur në kërkim nga policia e Perusë, të dyshuar se janë të përfshirë në ngarkesën prej 2.2 tonë të kapur dje nga autoritetet peruane. Gjatë operacionit të koduar “Bitcoin”, krahas urdhër arresteve për 2 shqiptarët kanë rënë në prangat e policisë 7 peruanë. Droga e lëngshme mësohet se ishte fshehur në kanaçe asparagusi dhe kishte si destinacion Holandën.
“Ne kemi sekuestruar dy tonë e dyqind kilogramë kokainë që ishte kushtëzuar për t’u transferuar nga deti në Holandë” nga porti i Callao, fqinj Lima, i tha AFP kolonel César Echevarría, kreu i Drejtorisë Kundër Drogës.
Echevarría bëri me dije se kjo organizatë e trafikut të drogës drejtohej nga dy shtetas shqiptarë dhe se droga do të dërgohej në portin e Roterdamit, në Holandë.
“Kjo është një organizatë kriminale me lidhje në Kolumbi, Ekuador dhe Shqipëri”, tha Echavarría.
“Ne po koordinojmë me seksionin e]Policisë Ndërkombëtare për të gjetur dy shtetas shqiptarë që kanë mbërritur në vendin tonë si lehtësues logjistik dhe koordinim me mafien shqiptare”, shtoi ai.
Këtë rradhë shqiptarët kishin gjetur një mënyrë të re , pasi sipas Echevarría pagesa do të bëhej nëpërjet monedhave virtuale bitcoin.
Që nga fillimi i vitit , policia peruane ka sekuestruar rreth 35 tonë drogë. Peruja është një nga prodhuesit më të mëdhenj në botë të kokainës, me rreth 400 tonë në vit, sipas shifrave zyrtare.
Përveç kësaj, ajo është, së bashku me Bolivinë, një nga prodhuesit më të mëdhenj të gjetheve të kokës, lëndë e parë për kokainën, pas Kolumbisë.
