Gjykata Penale Ndërkombëtare ka lëshuar një urdhër arresti ndaj gjeneralit libian Osama Njeem Almasri për krime kundër njerëzimit, duke përfshirë tortura, dhunë seksuale dhe vrasje në burgun e Mittigas.
Sipas dokumenteve të GJPN, që nga shkurti 2015, në këtë burg janë vrarë të paktën 34 të burgosur dhe 22 persona, përfshirë një fëmijë 5 vjeçar, janë dhunuar seksualisht nga rojet.
Gjenerali Almasri, i njohur si “Egjiptiani”, u bë pjesë e grupit të armatosur Rada pas përmbysjes së Gadafit dhe ka kontrolluar burgje dhe zona strategjike në Tripoli.
GJPN e akuzon atë për dhunë sistematike ndaj të burgosurve, të cilët u torturuan dhe vranë për arsye fetare, ideologjike ose lidhje të dyshuara me grupe rivale. Viktimat janë përballur me rrahje, elektroshok, izolim ekstrem dhe mungesë të kujdesit mjekësor, që çoi në vdekjen e të paktën 16 personave.
Më 18 janar 2025, GJPN komunikoi urdhrin e arrestit për Almasrin me gjashtë shtete, përfshirë Italinë.
Ai u arrestua më 19 janar në Itali, por më 21 janar, pa konsultim me GJPN, u lirua dhe u kthye në Libi.
Lirimi i tij tani ka sjellë një njoftim hetimi për kryeministren Meloni dhe për ministrat Nordio e Piantedosi.
Almasri (që do të thotë «Egjiptiani») doli në skenë gjatë ditëve të trazuara të përmbysjes së Gadafit dhe më pas u rreshtua me milicitë që kundërshtonin.
Ky vendim ka shkaktuar përplasje mes drejtësisë dhe politikës italiane, me akuzat që ministri i Drejtësisë Nordio ka neglizhuar urdhrin e arrestit, ndërsa, Giorgia Melonit, tha se i kërkuari u lirua me vendim të gjyqësorit.
GJPN ka kërkuar sqarime nga autoritetet dhe thekson detyrimin e shteteve për të bashkëpunuar në hetimet për krime kundër njerëzimit.
