Kryeministri Rama, ka reaguar ndaj akuzave të ngritura nga protestuesit që prej javësh kërkojnë dorëheqjen e tij, duke mohuar çdo përgjegjësi për korrupsionin dhe duke mbrojtur projektin e investimit në Sazan dhe Nartë.
Në një intervistë për Financial Times, Rama përdori një gjuhë të ashpër ndaj kritikëve të tij, duke deklaruar:
“Njerëzit thonë se unë jam drejtuesi i gjithë kësaj. U them ‘fuck you’. Nuk më takon mua të provoj se nuk jam ‘Kumbari’, por atyre ta provojnë se jam”.
Deklarata vjen në një kohë kur protestat kundër qeverisë dhe kundër projektit prej 4 miliardë dollarësh në Sazan dhe Nartë kanë hyrë në javën e tyre të katërt, ndërsa kundërshtarët e projektit kanë ngritur shqetësime për transparencën, ndikimin mjedisor dhe lidhjet e investimit me figura të afërta me administratën amerikane.
Gjatë intervistës, Rama mbrojti investimin e Jared Kushner dhe hodhi poshtë pretendimet që lidhin ekonominë shqiptare me pastrimin e parave dhe trafikun e drogës.
“Është e tmerrshme të thuhet se ekonomia shqiptare bazohet te pastrimi i parave. Pastrimi i parave është pjesë e ekonomisë sonë, por nuk është një problem kaq i madh. Mendoni se nuk ka pastrim parash në Londër? Ka. Por a mund të thuhet se ekonomia britanike mbështetet kryesisht te pastrimi i parave? Jo”, u shpreh ai.
Kryeministri pretendoi gjithashtu se shtimi i hetimeve për korrupsion nuk është tregues i rritjes së korrupsionit, por pasojë e reformave të ndërmarra nga qeveria e tij në sistemin e drejtësisë.
Rama argumentoi se një pjesë e kundërshtimeve ndaj projektit në Sazan lidhen edhe me kundërshtarët politikë të presidentit amerikan Donald Trump.
“Ka shumë interes për ta vrarë këtë projekt për shkak të Trumpit. Nëse nuk do të ishte Jared Kushner, askush nuk do t’ia dinte për flamingot, për Shqipërinë apo për ndonjë gjë tjetër. E gjithë kjo vjen nga urrejtja ndaj Trumpit”, deklaroi Rama.
Deklaratat e kryeministrit pritet të nxisin reagime të reja politike dhe publike, në një moment kur protestat kundër qeverisë, projektit të Sazanit dhe një sërë çështjesh të tjera që kanë shkaktuar pakënaqësi qytetare vijojnë të mbajnë të lartë tensionin në vend.
