Federata Shqiptare e Futbollit njofton tifozët se shorti elektronik për përzgjedhjen e fituesve të biletave për ndeshjen Shqipëri – Serbi, e vlefshme për kualifikueset e Botërorit 2026, do të vijojë edhe më 3 dhe 4 qershor.
Zgjatja e procesit u bë e domosdoshme për shkak të numrit rekord të aplikimeve dhe ngarkesës së madhe në platformë, duke kërkuar kështu një verifikim më të kujdesshëm dhe transparent për të gjithë pjesëmarrësit.
Pjesa e parë e fituesve tashmë ka marrë biletat e tyre përmes sistemit të dedikuar, ndërsa FSHF u kërkon të gjithë aplikuesve të kontrollojnë rregullisht email-in, duke përfshirë edhe kutinë Spam, për njoftime nga kompania T-Ticket, e cila menaxhon shitjen zyrtare të biletave.
Vetëm fituesit do të marrin linkun personal për blerjen e biletave. Nëse pas 4 qershorit nuk vjen asnjë email konfirmimi, do të thotë se nuk jeni përzgjedhur. Nuk do të dërgohen njoftime për ata që nuk kanë fituar, për të siguruar një proces të drejtë dhe transparent.
Kjo mënyrë e përzgjedhjes me short elektronik, e përdorur për herë të parë nga FSHF për këtë ndeshje, ka shkaktuar një ngarkesë të madhe dhe një numër rekord kërkesash, mbi 200 mijë persona kanë aplikuar për vetëm 22 mijë bileta, që është kapaciteti i stadiumit “Arenë Kombëtare”.
Për këtë arsye, procesi u shty me dy ditë nga data fillestare e parashikuar më 2 qershor, për të garantuar drejtësi dhe transparencë.
