Tensionet tregtare dhe pasiguria politike po ushtrojnë presion mbi ekonominë globale, duke zbehur pritshmëritë për rritje në vitet e ardhshme.
Fondi Monetar Ndërkombëtar, në raportin e tij të përditësuar për Perspektivën Ekonomike Botërore, paralajmëron se rritja e PBB-së globale pritet të ngadalësohet në 2.8% në vitin 2025 dhe në 3% në 2026 një ulje krahasuar me parashikimin e janarit prej 3.3%.
FMN e ndërlidh këtë ngadalësim me një përshkallëzim të ndjeshëm të barrierave tregtare, përfshirë vendosjen e tarifave të reja nga SHBA më 2 prill, që kanë çuar nivelin efektiv të tarifave në nivele të papara prej dekadash.
Këto masa, shoqëruar me kundërpërgjigje nga partnerët tregtarë, po e shtojnë paparashikueshmërinë dhe po pengojnë aktivitetin ekonomik global.
FMN e quan këtë raport të prillit një “parashikim referues”, pasi është hartuar mbi bazën e zhvillimeve deri më 4 prill 2025 dhe përfshin disa skenarë të mundshëm për të ardhmen.
Në nivel rajonal, ekonomitë e Ballkanit shfaqin një prirje pozitive. Shqipëria pritet të rritet me 3.8% në vitin 2025, duke shënuar një përmirësim krahasuar me parashikimin e mëparshëm prej 3.4%.
Kosova ruan ritmin e qëndrueshëm me një rritje prej 4%, ndërsa Serbia parashikohet të rritet me 3.5%. Mali i Zi dhe Maqedonia e Veriut do të kenë rritje me 3.2%, ndërsa Bosnje-Hercegovina me 2.8%.
Për Ukrainën, rritja për vitin 2025 parashikohet në 4.5%, ndërsa për këtë vit mbetet në 2%.
Në anën tjetër, inflacioni global pritet të bjerë më ngadalë sesa mendohej më parë, duke zbritur në 4.3% në 2025 dhe në 3.6% në 2026.
Drejtoresha e FMN-së, Kristalina Georgieva, ka theksuar se fragmentimi i zinxhirit tregtar global po nxjerr në pah rëndësinë në rritje të sigurisë kombëtare në politikëbërje ekonomike, ku shumë vende po zhvendosin fokusin nga efikasiteti drejt vetë-mjaftueshmërisë një kthim i vëmendjes drejt prodhimit vendas, veçanërisht në sektorë si industria e çelikut.
