Deputeti demokrat Edi Paloka është pyetur lidhur me vrasjen e ndodhur mesditën e kësaj të mërkurë në zonën e “Ranës së Hedhun”, ku viktimë mbeti biznesmeni Ardian Nikulaj.
Për Palokën kjo vrasje dyshon se është politike, ndërkohë ka theksuar se Nikulaj në këto zgjedhje ka qenë mbështetës i kandidatit të koalicionit “Bashkë Fitojmë”, Pashk Gjoni.
“Mendoj se vrasja ka qëllim poliitk. Në këto zgjedhje ai ka qenë mbështetës i kandidatit të koalicionit “Bashë Fitojmë” megjithatë nuk dua të flas më tepër sepse duhet të kem informacion”, tha Paloka.
Ngjarja e rëndë ndodhi mesditën e sotme në rrugën e plazhit në Shëngjin, në ambientet e biznesit të Ardian Nukulajt, “Coral Shëngjin”.
Dy persona të maskuar janë afruar pranë restorantit në pronësi të biznesmenit 51 vjeçar dhe kanë hapur zjarr. Plumbat kanë qenë fatal për Ardian Nikulaj, pasi ai ka ndërruar jetë në vendngjarje.
Dy vite më parë ai ka qenë kandidat për deputet me Partinë Social-Demokrate të Tom Doshit, ndërsa aktualisht kandidonte për këshillin bashkiak të Lezhës.
Kujtojmë se personat që ekzekutuan Ardian Nikulajn, e kishin ndjekur biznesmenin prej kohësh dhe prisnin momentin e duhur për ta vrarë. Siç raportohet, në momentin që kanë parë që është futur vetëm në lokalin e tij, autorët janë afruar nga dera e pasme e biznesit me motor. Më pas, njëri prej tyre, veshur me një jelek fosforeshent, me maskë farmaceutike dhe skafandrën e motorit në kokë, u fut brenda dhe qëlloi në drejtim të biznesmenit.
Sipas të dhënave të deritanishme, ai ka qëlluar të paktën shtatë herë me silenciator. Më pas u largua pasi jashtë e priste bashkëpunëtori me motor. Të dy janë zhdukur pa gjurmë dhe nga çfarë raportohet deri më tani, pasi kanë braktisur motorin, kanë hipur në një mjet tip ‘Range Rover’ me ngjyrë të zezë e targa angleze.
