Prokuroria e Përgjithshme ka kërkuar hetim për ish-ministrin e Bujqësisë, Niko Peleshin.
Organi i akuzës e ka marrë këtë vendim, pas publikimit në media, të lajmit, se Peleshi kur ishte ministër i Bujqësë ka lejuar që në vend të futen pesticide të dëmshme për njerëzëri.
Ka qenë vetë kryeprokurorja, Arta Marku, e cila i ka dërguar një shkresë Prokurisë së Tiranës, raporton “Report tv”.
Marku thekson në shkresë, se ka dyshime se Peleshi ka shpërdoruar detyrën, duke urdhëruar zhbllokimin e insekticidit “Silikon Mix”, i cili përdoret te frutat dhe perimet, por njëkohësisht është tepër i dëmshëm për shëndetin e konsumatorit.
Bashkangjitur me shkresën, Prokruroria e Përgjithshme i ka dërguar Prokurorisë së Tiranës, edhe materialet filmike të transmetuara në media.
“Bashkëlidhur ju dërgojmë për vlerësim ligjor sipas kompetencës, të dhëna të printuara nga mediat audiovizive ku përfshihen dyshime në lidhje me shpërdorimin e detyrës prej shtetasit Niko Peleshi. Konkretisht, nga publikimet e fundit rezulton se ish-Ministri i Bujqësisë, ka lëshuar në kundërshtim me ligjin urdhrin për zhbllokimin e insekticidit Silikon Mix, i cili përdoret në kultivimin e frutave dhe perimeve, me pasoja të dëmshme.Në mbështetje të neneve 38 dhe 50/1 të ligjit “Për organizimin dhe Funksionimin e Prokurorisë në Republikën e Shqipërisë”, pa cenuar sekretin hetimor, kërkojmë informacion në lidhje me mënyrën e trajtimit të materialit”, thuhet në shkresën e Arta Markut.
