Lorenc Shehu do të zëvendësojë përkohësisht Roven Zekën në krye të Policisë Rrugore pas arrestimit të këtij të fundit nga SPAK për akuzat e korrupsionit.
Roven Zeka mori postin e Drejtorit të Policisë Rrugore të Tiranës në Dhjetor të vitit 2024, pas një karriere të gjatë në Elbasan. Ai ishte një nga oficerët që morën pjesë në procesin e ripërtëritjes së trupës drejtuese të komisariateve në mbarë vendin, një iniciativë që nisi me ndryshimet ligjore dhe emërimin e Ilir Prodës në krye të Policisë së Shtetit.
Si ndodhi ngjarja:
SPAK ka bërë të ditur se ngjarja ka ndodhur më 16 Prill 2025, kur në Tiranë u regjistrua një aksident automobilistik ku u përplasën dy mjete. Si pasojë e aksidentit, pesë persona, të cilët udhëtonin në njërën nga makinat, pësuan lëndime dhe u dërguan menjëherë në spital për ndihmë mjekësore.
Arrestimi i Roven Zekës, bashkë me tre oficerë të tjerë të Policisë Rrugore, erdhi pas përgjimeve dhe provave të siguruara nga hetimet. Sipas dosjes hetimore, Edison Tabaku, një oficer policie i angazhuar në këtë rast, ka kërkuar shuma monetare për të shmangur arrestimin e Anisa Vrionit, e cila ishte e përfshirë në aksidentin e ndodhur. Ai kërkoi një shumë prej 1.000 eurosh nga Erges Vrioni, bashkëshorti i Anisa Vrionit, duke e takuar personalisht në një lokal dhe i kërkoi edhe 1.000 euro të tjera, pasi i tha se kishte “persona të tjerë mbi kokë.”
Një verifikim i telefonit të Tabakut ka zbuluar se ai kishte komunikuar me shefat e tij, Roven Zeka dhe Sokol Novaku, për kërkesat financiare, duke i informuar ata për shumat që po merrte dhe duke lënë afat deri të nesërmen për pagesën e mbetur.
