Detaje të reja tronditëse janë zbuluar nga mediat italiane lidhur me vrasjen makabre të studentes shqiptare 22-vjeçare, Ilaria Sula.
Sipas hetimeve, autori i dyshuar, i dashuri i saj Mark Antony Samson, 23 vjeç, e goditi tri herë me thikë në fyt më 25 mars 2025, brenda banesës së tij ku jetonte me familjen. Ngjarja e rëndë ndodhi pas një debati mes çiftit.
Trupi i pajetë i vajzës u mbajt i fshehur për më shumë se 20 orë në dhomën e Samsonit, para se ai ta fuste në një valixhe dhe ta transportonte në një zonë të largët, rreth 40 kilometra larg Romës. Kufoma u gjet një javë më pas.
Autopsia e kryer në Institutin e Mjekësisë Ligjore “La Sapienza” konfirmon se Ilaria ka ndërruar jetë për shkak të një hemorragjie të rëndë të shkaktuar nga plagët e thella në qafë.
Gjithashtu, janë gjetur shenja që sugjerojnë përpjekje për vetëmbrojtje gjatë një përleshjeje fizike.
Gjurmët e gjakut në dhomën e autorit dhe përpjekjet për ta pastruar atë mbështesin dyshimet për tentativë për të fshehur gjurmët e krimit.
Hetuesit po hetojnë edhe mundësinë që Samson të mos ketë vepruar i vetëm. Targat e makinës së familjes së tij janë kapur nga një pajisje monitoruese pranë zonës ku u gjet trupi.
Ky fakt ka shtuar dyshimet për përfshirjen e prindërve të tij në ndihmën për fshehjen e krimit.
Ata kanë dhënë deklarata kontradiktore mbi vendndodhjen e tyre në natën e ngjarjes.
Samson ka pranuar vrasjen, duke deklaruar se “humbi kontrollin” dhe se nuk kishte qëllim ta vriste.
Ai është në paraburgim dhe akuzohet për vrasje me dashje dhe fshehje të kufomës. Gjithashtu, autoritetet janë ende në kërkim të armës së krimit dhe të më shumë provave, për të zbardhur të plotë rrethanat e kësaj ngjarjeje që ka tronditur jo vetëm Italinë, por edhe opinionin publik në Shqipëri.
Protesta të shumta janë zhvilluar në Itali pas vrasjes së 22-vjeçares shqiptare, Ilaria Sula. Në Universitetin “La Sapienza” në Romë, ku ajo studionte, qindra të rinj e të reja, veçanërisht bashkëstudentë të saj, u mblodhën në shenjë proteste dhe nderimi.
Të përlotur dhe në heshtje, studentët zhvilluan fillimisht homazhe në oborrin e universitetit, duke vendosur lule pranë një fotografie të Ilarias.
Më pas, ata ngritën simbolikisht çelësa në duar, në një akt që shërbente si thirrje ndaj institucioneve për të hapur “dyert e drejtësisë” dhe për të mos lejuar që krimi të mbulohet.
