Në orët e para të mëngjesit, në një supermarket në rrugën “Irfan Tomini” në Tiranë, ndodhi një sherr i përgjakshëm, ku 29-vjeçari Jurgen Duka, humbi jetën.
I riu është dërguar në spital, por fat të keq nuk ka mundur t’i mbijetonte plagëve të marra.
Viktima rezulton me precedentë të mëparshem penalë në fushën e narkotikëve. Jurgen Duka mësohet se është arrestuar në vitin 2020 në kuadër të një operacioni anti-drogë mes Shqipërisë dhe Italisë ku u prangosën edhe disa persona të tjerë.
Siç shihet nga pamjet e publikuara nga “Syri.net”, Jurgen Duka, së bashku me mikun e tij O. D., ndodhen në kasën e marketit. Më pas, shihet se si Jurgeni, ka nisur një konflikt verbal para banakut të shitësit ku po bën pagesën, me një tjetër blerës. Në debat përfshihet edhe shoku i viktimës.
Më pas, për të shuar konfliktin ndërhyjnë edhe persona të tjerë, të cilët nuk dihen nëse janë blerës të çastit apo shokë me viktimën ose autorin. Shpejt, konflikti verbal përshkallëzohet në përplasje fizike, ku autori, gjatë një momenti nxjerr armën dhe qëllon ndaj 27-vjeçarit.
Klientët largohen të alarmuar, ndërsa viktima, bie menjëherë në tokë pa ndjenja. Në godinë, mbetet vetëm viktima dhe shitësi. Vlen të theksohet se policia po punon për identifikimin dhe kapjen e autorit, ndërsa në pyetje janë marrë edhe miqtë e viktimës, për të mësuar kështu, arsyen e saktë se përse ndodhi konflikti.
