Mbledhja e Këshillit të Mandateve për shqyrtimin e çështjes së imunitetit të zëvendëskryeministres dhe ministres së Infrastrukturës dhe Energjitikës, Belinda Balluku, tashmë nën hetim nga SPAK për aferat e saj të shumta, do të zhvillohet më 23 shkurt, në orën 10:00. Lajmi është bërë i ditur pasi fillimisht mbledhja ishte parashikuar të mbahej më 28 janar, por u shty për një datë tjetër të pacaktuar.
Shqyrtimi i çështjes së imunitetit të Ballukut vjen në një kohë kur Partia Socialiste ka prezantuar një nismë ligjore, e cila synon të kufizojë mundësinë e gjyqësorit për të pezulluar funksione kushtetuese të anëtarëve të ekzekutivit.
Ndërkohë, kryeministri Rama deklaroi gjatë mbledhjes së Grupit Parlamentar të Partisë Socialiste se Belinda Balluku i ka paraqitur tre herë dorëheqjen, por ai nuk i ka pranuar ato. Sipas tij, dorëheqjet janë dorëzuar pas zhvillimeve nga ana e drejtësisë.
“Belinda Balluku ma ka dorëzuar tre herë dorëheqjen, i kam atje në dosje. Një herë kur iu ngrit akuza, një herë kur iu bë pezullimi i parë dhe herën e tretë kur nuk mori vendim GJK. Unë i kam refuzuar dorëheqjet, sepse dorëheqje nën presionin e një fuqie që ka dalë nga territori i vet dhe është fut në territorin e pavarësisë pushtetin ekzekutiv nuk ka. I jam falënderues për faktin që nuk ka persistuar, por ka vazhduar ta marrë të gjithë atë baltë mbi fytyrë sepse unë nuk e pranoj dorëheqjen deri kur të plotësohen kushtet. Se kur plotësohen kushtet nuk e cakton dot as prokurori, as media dhe as gjyqi popullor,” tha Rama.
Rama shtoi se vendimmarrja për një dorëheqje nuk mund të diktohet nga prokuroria, media apo ajo që e cilësoi si “gjyqi popullor”, megjithëse lista e Ballukut në SPAK është e gjatë. Duket se kryeministri po bën gjithçka për të mbrojtur bashkëpunëtoren e tij, që shumë shpejt do ta tërheqë në gropën që po fundosen njëri pas tjetrit.
