Kandidati i Partisë Demokratike për Elbasanin, Luçiano Boçi ka reaguar pas shpalljes së ish-kryeministrit Sali Berisha dhe Familjes së tij non-grata në SHBA. Në një postim në Facebook, Boçi ka publikuar një foto të Berishës me 2 nga ish-presidentët amerikan, George Bush, Bill Clinton dhe me presidentin Joe Biden. Ai e krahason Berishën me Krishtin kur shkruan se “edhe Krishtit i ngarkaun kryqin më të rëndë drejt Golgotës, pa e ditur se po e ngrinin historikisht”. Ndërsa ata që janë të lumtur për këtë ngjarje sipas Boçit, janë “farisenjtë”.
“Dhe Krishtit i ngarkuan kryqin më të rëndë drejt Golgotës, pa e ditur se po e ngrinin drejt përjetësisë. Ata që e dënuan ishin mëkëmbës të Perandorisë së kohës. Ata folën po ashtu në emër të ligjit dhe bashkëpunuan me farisenjtë vendas. Ajo që humbi historikisht ishte Perandoria. Ata që fituan përkohësisht dhe fërkuan duart për momentin ishin farisenjtë,”- shkruan Boçi.
Ish-kryeministrit Sali Berisha dhe familjes së tij iu ndalua ditën e sotme hyrja në Shtetet e Bashkuara të Amerikës . Lajmin e dha Sekretari Amerikan i Shtetit, Anthony Blinken i cili shpërndau deklaratën e DASH në të cilën thuhej se Berisha është përfshirë në afera korruptive dhe ka minuar demokracinë gjatë ushtrimit të detyrës. Berisha reagoi për vendimin duke thënë se kërkon që SHBA të bëjë transparente çdo provë e fakt që vërtetojnë arsyet e vendimit.
