Nga sot biznesmeni Shefqet Kastrati do të jetë zyrtarisht investitori kryesor i kompanisë mediatike “Euronews Albania”.
Ditën e sotme bëhet me dije se Kastrati ka arritur të blejë 60% të aksioneve të kësaj kompanie, të cilat i përkisnin biznesmenit shqiptar Theodori Çami.
Pavarwsisht ndryshimit të investitorit kryesor burime bëjnë me dije se menaxhimi i kompanisë mediatike dhe stafi do të jetë i pandryshuar.
Ndërkohë që kompania “Euronews” me bazë në Lyon të Francës do të zotërojë 40% të aksioneve.
E vetmja gjë që ndryshon pra, është fakti se “Euronews Albania” do të jetë tashmë pjesë e Kastrati Group.
Njoftimi:
“Kastrati Group është bërë sot zyrtarisht pjesë e Intermedia Group me 60 % të aksioneve ndërsa 40 % të aksioneve i mbetet Z. Theodhori Çami. Kompania e njohur për suksesin e saj në investime në fusha të ndryshme e ka shtrirë ambicien e saj dhe në tregun mediatik duke u bërë zotëruese e aksioneve të një prej televizioneve më të suksesshme në Shqipëri.
Intermedia group është një kompani mediatike pjesë e të cilit janë edhe Euronews Albania, Kosova e Maqedonia e Veriut si franchise i parë në historinë e familjes së madhe të Euronews Group, media informative Nr. 1 në Europë.
Me një investim kurajoz dhe të pazakontë në rajon, si në teknologji ashtu edhe në burime njerëzore, Euronews Albania, vetëm në 2 vjet ka arritur të jetë jetë pararojë e një revolucioni mediatik, i shumëkërkuar nga qytetarët dhe investitorët në Shqipëri.
Ky bashkim profesional do të shoqërohet me një plan të ri investimesh, që ka si qëllim të parë, ngritjen dhe zhvillimin me të njëjtën ambicie profesionale edhe për Euronews Kosova dhe Euronews Maqedonia e Veriut, ku do të zgjerohet projekti shqipfolës.
Kujtojmë se Kastrati Group është një kompani lider në rajon në shumë fusha, kryesisht në atë të energjisë por jo vetëm, me seli bazë në Shqipëri. Kompania e themeluar në fillim të viteve 1990, përmes rrjeti dhe zyrave përfaqësuese është e mirëpozicionuar në të gjithë rajonet më të rëndësishme në mbarë botën. Nga viti në vit, nga dekada në dekadë, Kastrati Group ka intensifikuar investimet në një sërë sektorësh të tjerë të rëndësishëm, çka e bën atë një nga grupet më të rëndësishme të investitorëve në Shqipëri, rajon dhe më gjerë.
Me këtë lëvizje Kastrati Group synon suksesin dhe si një lider mediatik për trevat shqipfolëse”, thuhet në njoftimin e kompanisë Kastrati.
