Një incident i rëndë ka ndodhur në Ostren të Bulqizës, ku kandidati i Partisë Demokratike për Qarkun e Dibrës, Xhelal Mziu, dhe nipi i tij, janë përfshirë në një përplasje fizike me punonjësin e njësisë administrative, Kalosh Murra.
Ky i fundit, përgjegjës për ndihmën ekonomike në zonë, u godit pas një mbledhjeje të shtabit elektoral të PD në Gollobordë.
Sipas dëshmitarëve, Mziu është shkëputur nga grupi dhe ka sulmuar Murrën me grusht, teksa ai ndodhej pranë zyrës së njësisë administrative. Menjëherë pas ngjarjes, në vendngjarje mbërritën forcat e policisë dhe hetues të SPAK për të nisur hetimet.
Reagimi erdhi nga lideri i opozitës Sali Berisha, i cili gjatë një dalje për mediat nga selia e PD-së, akuzoi drejtpërdrejt përfaqësuesin politik të PS në Dibër, Blendi Klosin, si njeriun pas këtij provokimi.
“Është një kurth i pastër. Një provokacion i ulët orkestruar nga Blendi Klosi dhe militantët fanatikë të PS-së, vetëm sepse ndjejnë se po humbin terren”, u shpreh Berisha.
Ai e cilësoi ngjarjen një inskenim të qëllimshëm për të goditur politikisht përfaqësuesit e opozitës, duke mos kursyer ironinë ndaj Klosit.
“E njihni mirë kryebixhozxhiun Klosi, pyetni përreth dhe do mësoni vetë se çfarë ka lënë pas nëpër bixhoze. Ai është simboli i provokimit dhe dështimit në këtë qark,” tha Berisha.
Kjo tregon se përplasja në Dibër nuk është thjesht një incident fizik, por një përplasje e ashpër politike në mes të një fushate të tensionuar.
