Një tjetër aferë e rëndë financiare trondit Bashkinë Shkodër nën drejtimin e Benet Becit. Tenderi me objekt “Blerje e artikujve ushqimorë”, me numër reference REF-44826-04-12-2025, është kthyer në një shembull flagrant të abuzimit me fondet publike.
Fitues është shpallur kompania SEAD-SGS shpk, në pronësi të Entela Liçit, me një ofertë prej 22,266,682 lekësh pa TVSH, që përbën 99.6% të fondit limit prej 22,354,848 lekësh. Në garë kanë marrë pjesë vetëm dy kompani, por Bashkia ka zgjedhur pikërisht ofertën më të lartë, duke anashkaluar një diferencë prej 35 milionë lekësh të vjetra me ofertën tjetër. Ky fakt tregon qartë mungesën e konkurrencës reale dhe synimin e qartë për të fryrë shifrat në kurriz të buxhetit publik.
Skandali rëndohet akoma më shumë po të kemi parasysh destinacionin e këtyre parave. Bëhet fjalë për furnizimin me ushqime të çerdheve, kopshteve dhe Strehëzës për fëmijët pa kujdes prindëror. Pra, korrupsioni ka prekur drejtpërdrejt ushqimin e fëmijëve më të pambrojtur, duke e kthyer këtë tender në një akt cinik dhe të pamëshirshëm.
Në total, abuzimi arrin shifrën e 270 milionë lekëve të vjetra, një shumë e vjedhur hapur nga buka e gojës së fëmijëve të Shkodrës. Ky është vetëm një nga rastet që nxjerr zbuluar mënyrën se si menaxhohet Bashkia nën drejtimin e Benet Becit, ku tenderat janë shndërruar në burim pasurimi për klientët e afërt dhe jo në shërbim të qytetarëve.
Ky rast ngre pyetje serioze për heshtjen e institucioneve të drejtësisë, të cilat ende nuk kanë reaguar përballë një vjedhjeje kaq të hapur dhe të dokumentuar. Hetimi i menjëhershëm i kësaj afere është i domosdoshëm, sepse bëhet fjalë për fondet që u përkasin më të vegjëlve dhe më të pambrojturve.
Skandali i tenderit ushqimor në Shkodër tregon se deri ku ka arritur shpërdorimi i fondeve publike: deri tek buka e fëmijëve.
