I përballur me një krizë migratore në kufijtë e tij, Komisioni Evropian ka dalë me një projektligj për të futur në listën e zezë subjektet e përfshira në trafikun e qenieve njerëzore.
Polonia, Lituania dhe Letonia kanë parë flukse emigrantësh në kufijtë e tyre me Bjellorusinë. BE akuzon Minskun se po përdor refugjatët për t’u hakmarrë për vendosjen e sanksioneve.
“Këto veprime përbëjnë një kërcënim real për sigurinë e Unionit tonë. Ato shkojnë përtej Bjellorusisë. Ata po vënë në provë unitetin tonë. Por BE ka vullnetin, unitetin dhe mjetet për t’u përballur me këtë krizë dhe të tjera si kjo”, tha Ursula von der Leyen, presidente e Komisionit Evropian.
Blloku e ka goditur Minskun me një seri sanksionesh ndaj regjimit autoritar të presidentit Lukashenko. Megjithatë, propozimi i ri synon të dëmtojë financiarisht kompanitë e identifikuara që ndihmojnë në lëvizjen e emigrantëve në kufi.
Mes masave që do të merren përfshihen: ngrirja e operacioneve në BE; tërheqja e licencave të veprimit; ndalimi i fluturimeve mbi BE dhe aksesin në portet e tij; dhe pezullimi i të drejtave për të vepruar brenda bllokut.
Megjithatë, në Parlamentin Evropian ka edhe nga ata që deklarojnë se BE nuk duhet të shkojë më tej.
“Për sa kohë shohim njerëzit si kërcënimin më të madh, ne i japim Bjellorusisë dhe regjimeve të tjera mjete për të vepruar. Ne duhet t’i ndihmojmë njerëzit në nevojë. Ata nuk janë armë, por njerëz në vështirësi”, tha Ska Keller, euro-deputete e të Gjelbërve në Gjermani.
Beteja me Bjellorusinë ka ekspozuar pikën e dobët të Evropës me emigracionin. Drafti i ri synon të mbushë boshllëqet dhe të parandalojë krijimin e situatave të ngjashme në të ardhmen. Burimi: Euronews
