Ditën e sotme Gjykata e Apelit Tiranë vendosi mospranimin e kërkesës së ankuesit Partia Demokratike e Shqipërisë për përjashtimin e gjyqtares Irida Kacerja, lidhur me gjyqin për bashkimin e dy Statuteve të Partisë Demokratike. Përjashtimi ishte kërkuar nga deputeti i Partisë Demokratike, Gazmend Bardhi.
Por po ashtu, përveç rrëzimit të kërkesës, Apeli vendosi gjithashtu gjobitjen e kërkuesit Partia Demokratike e Shqipërisë në shumën 10,000 lekë të reja. Avokati i PD-së, Indrit Sefa pretendoi se kjo gjyqtare mund të paragjykojë çështjen pasi seancën e kaluar, kërkoi që përfaqësimi ligjor të jetë i rregulluar sipas Statutit të vetë kësaj partie.
Ankimi është bërë nga mbështetësit e Lulzim Bashës në PD, kundër vendimit të Gjykatës së Tiranës, që refuzoi të regjistronte bashkë edhe ndryshimet statutore të kuvendit të 17 korrikut të kaluar, edhe ato të 18 dhjetorit, të dy Kuvende të thirrura nga ish-kryetari i Partisë Demokratike, Lulzim Basha. Një nga vendimet që janë marrë në ato mbledhje, kanë qenë përjashtimi i të gjithë personave që janë “non grata”, duke goditur Sali Berishën, i cili mori drejtimin e selisë blu.
Në rast se gjykata do të pranojë ankimin e PD-së për të bashkangjitur dy kërkesat për ndryshimet statutore, atëherë “zhbëhet” Kuvendi i 11 dhjetorit 2021, i Sali Berishës. Ndërkohë ndryshimet statutore të Kuvendit të Sali Berishës, u regjistruan nga gjyqtari Agron Zhukri i cili më 25 mars i kaloi PD-në, Sali Berishës.
