Kreu i Partisë Demokratike, Lulzim Basha, vazhdon takimet në qytete të ndryshme të vendit dhe sot radha ishte e qytetit të Vlorës.
Basha nuk ka pasur një takim të thjeshtë më qytetarët, por ka zgjedhur një kategori të rëndësishme, studentët. Nga Universiteti “Ismail Qemali”, Basha ka folur para studentëve rreth sistemit arsimor, i cili ndodhet në ditët e tij më të zeza dhe ka për të vazhduar në këtë gjendje, përsa kohë është si udhëheqës Ligji për Arsimin e Lartë.
Duke ftuar vlonjatët t’i bashkohen tubimit dhe protestës me 16 shkurt në Tiranë, Basha u shpreh se kryeministrin Rama e gënjen mendja kur mendon se është “Pashai i Vlorës” dhe i gjithë Shqipërisë.
“Arsimi do të jetë në një ditë më të zezë nëse vazhdohet me këtë ligj të Arsimit të Lartë, që i vuri kazmën universiteteve publike. Demokratizimi i vendimmarrjes është normë evropiane, është garanci, siç është garanci për shtetin është garanci edhe për universitetin. Siç kemi ardhur sot në këtë ditë këtu, se e gënjen mendja atë që është Pashai i Vlorës dhe i të gjithë Shqipërisë, se ai i di të gjitha, prandaj ai meriton të ketë edhe pushtetin ekzekutiv, edhe parlamentin, edhe gjyqësorin, edhe median, edhe ekonominë.
Edhe po t’i kishte fakultetet intelektuale nuk do të arrinte kurrë ti bënte, lëre më kur kemi të bëjmë me një njeri të mangët, në shkollim, në formim dhe në performancë. Përqendrimi i të gjitha pushteteve në një dorë është fundi i mirëmenazhimit të një sistemi. Prandaj, demokratizimi i sistemit arsimor do të jetë prioritare për ne. Çështjet kryesore të vendimmarrjes do t’u takojnë vetë universiteteve dhe aty ku duhet, do të jenë të përfaqësuar sa duhet edhe studentë”, tha mes tjerash Basha.
