Gazetari Elton Qyno ka dhënë detaje për atentatin e rëndë në Lezhë, ku u ekzekutuan Kreshnik dhe Gentjana Mujeci, duke lënë pas katër fëmijë.
Në një deklaratë për Top Channel, Qyno e lidhi ngjarjen me një zinxhir konfliktesh të nisura që në vitin 2018 dhe me mungesën e vendimeve përfundimtare nga drejtësia.
“E gjithë zanafilla fillon në 2018-ën dhe gjithë thelbi i problemit është pikërisht vendimet e gjykatave, të cilat nuk kanë qenë në gjendje të dalin me një vendim për t’i dhënë zgjidhje rastit të parë të rëndë ku ka humbur jetën Genc Mhillaj,” u shpreh Qyno.
Sipas tij, vonesat dhe vendimet e paqarta kanë krijuar terren për vetëgjyqësi.
“Drejtësia jonë nuk është në gjendje që të vërë pikat mbi se kush e vrau. Pavarësisht se bëhen letra dhe gjykatat janë kthyer në kombinat letrash, në fund një gjykatë thotë kështu, një gjykatë thotë ashtu. Kthehet prapë për rigjykim dhe çështja është në apel. Në pamundësi për t’u gjykuar shpejt dhe në apel, atëherë hyn gjykimi paralel dhe hetimi paralel… fillon breshëria e automatikut. Pra, siç ma bëre në 2018, po ta bëjnë në 2026-ën. Më vrave babën, po të vras edhe unë ty dhe kaq”, tha gazetari.
Qyno paralajmëroi se konflikti mund të mos mbyllet me këtë ngjarje, duke e krahasuar me rastin e Nikulajve në Shëngjin.
“Janë katër fëmijë… nëse kjo vazhdon, do të vazhdojë. Unë parashikoj një fund tragjik mes dy familjeve. Identik siç filloi rasti me Nikulajn. Në momentin që u vra Nikulaj në Shëngjin të Lezhës, filloi një kasaphanë që deri tani është numëruar pesë apo gjashtë viktima. Në vend që të mbyllej dhe të shkonin palët drejt një pajtimi, shkoi akoma dhe më keq, ku të dyja palët filluan të vrisnin edhe njerëz të pafajshëm brenda dy familjeve”, tha ai.
Një nga detajet më të rënda, sipas gazetarit, është fakti që viktimë mbeti edhe bashkëshortja e Mujecit. Qyno tha se Kreshnik Mujeci lëvizte shpesh me bashkëshorten, pasi i druhej një hakmarrjeje të mundshme.
“Problemi i kësaj ngjarjeje është tjetër gjë, sepse u vra gruaja. Zakonisht, në dijeninë time, bashkëshorten ky e lëvizte gjithmonë me vete edhe për faktin që mbante armë dhe për t’iu shmangur kontrolleve të policisë, nëse do të kapej, armën pa leje t’ia merrte e shoqja”, tha ai.
Qyno shtoi se autori kryesor i dyshuar, Adriano Mhillaj, ishte në kërkim që prej janarit 2026, por pavarësisht kësaj kishte arritur, sipas tij, të organizonte krimin.
“Autori kryesor që dyshohet se ka organizuar dhe qëlluar është Adriano Mhillaj. Që nga janari 2026 ka qenë në kërkim me vendim të Gjykatës së Shkodrës për kanosje me armë dhe mbajtje pa leje të armëve të zjarrit. Që nga kjo kohë deri më tani, ky jo vetëm që s’është kapur, por ka pasur luksin të organizojë, të mobilizojë, të gjejë armët, makinat, personat dhe më pas objektivin dhe ta ekzekutojë. Pra nga një masë shkojmë në një masë të dytë ‘arrest në burg’ dhe shteti sot e kësaj dite akoma s’e ka kapur”, tha Qyno.
