Katër shtetas serbë u arrestuan në Gjakovë dhe 12 të tjerë në Prizren nga Policia e Kosovës, teksa udhëtonin me katër automjete të regjistruara në Kragujevc, Serbi.
Gjatë kontrollit, u gjetën materiale që i lidhin me inteligjencën ushtarake serbe dhe me grupin e armatosur që mori pjesë në sulmin e shtatorit në Banjskë.
Në mesin e provave të sekuestruara ishin, fotografi të hartës së Kosovës, imazhe të anëtarëve të vrarë të grupit të Banjskës, dy thika, një sopatë dhe një dritë rotative.
Në Gjakovë, të arrestuarit ishin Branko Rakiç, Nemanja Vamokiç (toger policie), Pavle Kragoviç dhe Millovan Steviç (kapiten në ushtrinë serbe).
Ndërsa në Prizren, 12 të dyshuarit ishin strehuar në Seminarin Ortodoks të Bogosllavisë mes tyre dy oficerë aktivë të shërbimeve të sigurisë serbe. Njëri nga të ndaluarit rezulton të jetë i afërm i Vladimir Radivojeviç, i njohur si “Mami”, i dyshuar për vrasjen e rreshterit Afrim Bunjaku. Një tjetër ishte kapiten i klasit të parë i ushtrisë serbe.
Sipas urdhrit të prokurorit, të dyshuarit janë ndaluar për 48 orë. Disa prej të ndaluarve në Prizren janë liruar, ndërsa dy mbeten në paraburgim për prezantim të rremë si pjesëtarë të MUP-it.
Policia e Kosovës përmes Drejtorisë Rajonale në Gjakovë nënvizoi angazhimin e saj për parandalimin e aktiviteteve të dyshimta në vend.
Ndërkohë, kryeministri në detyrë, Albin Kurti, ngriti shqetësimin për përpjekjet e Serbisë për të ndikuar në krijimin e institucioneve të reja në Kosovë, duke akuzuar presidentin serb Aleksandar Vuçiq për mbështetje të Listës Serbe dhe Milan Radoiçiqit në këtë drejtim.
Dioqeza e Rashkës dhe Prizrenit ka mohuar akuzat se ambientet fetare janë përdorur për qëllime politike.
Nga ana tjetër, presidenti Vuçiq ka mbrojtur të arrestuarit, duke deklaruar se ata ishin në një udhëtim për të vizituar manastiret dhe seminarin, dhe se provat e paraqitura janë të pavërteta.
