Ministri Arben Ahmetaj ka pushtuar sot rrjetin, pasi ka shkuar në emisionin “Opinion” me një valixhe udhëtimesh, që sipas ministrit, kishte brenda dosjet me emrat dhe numrat e llogarive të personave që kanë përfituar nga paketa e ndihmave të qeverisë shqiptare.
Gjatë emisionit rezultoi se valixhja “kishte patur” lajme të mira për disa kategori.
Ahmetaj deklaroi se ka kërkuar shtrjen e kredive me tre muaj dhe se ky vendim pritet të merret javën e ardhshme, nga Guverantori i Bankës së Shqipërisë.
“Cila është logjika? Logjika është kjo. Nëse ty të shtyhet pagesa e kredisë në maj, atëherë natyrshëm pyet: po unë s’po punoj si do të paguaj kredinë? Kryeministri pasi ka lexuar kërkesat, ka kërkuar që javën tjetër të bëhet sërish me Guvernatorin një shtyrje tjetër kredish, në mënyrë që t’u jepet kohë. Do të shtyhet edhe tre muaj të tjerë. Që t’u japim mundësi të gjithë qytetarëve që të kenë dy apo tre muaj punë që të paguajnë kredinë”, tha Ahmetaj
Më tej, i pyetur nëse do të ketë ndihmë nga shteti për naftëtarët e Ballshit të cilët edhe para krizës së koronavirusit kanë patur probleme me pagat për një periudhë të gjatë, ai tha se sot qeveria ka hartuar një plan i cili nga nesër i akordon kësaj kategorie pagën e luftës prej 40 mijë lekësh.
Sakaq, lidhur me rindërtimin e banesave të dëmtuara pas tërmetit të 26 nëntorit, ministri tha se 3,400 shtëpitë do të ndërtohen brenda këtij viti.
“Ne kemi filluar punë për rindërtimin. 3400 shtëpitë do të ndërtohen brenda këtij viti. Ne nesër fillojmë në të gjithë zonën e dëmtuar me shkollat. Sot që flasim po bëhen projektet e detajuara të banesave kolektive. Puna fillon në fund të qershorit maksimumi në mes të korrikut, ndërsa puna për njësitë individuale, menjëherë javës që vjen hidhet sërish për prokurim”.
