Ndërkohë që fasha 800 kWh akoma nuk është aplikuar tek konsumatorët e energjisë elektrike, kryeministri Edi Rama ka folur sërish në lidhje me rritjen e çmimit të energjisë elektrike.
“Për çështje dy tre ditësh ministrja e energjisë do të informojë publikun me qëndrimin tonë. Besoj se në kushtet kur kemi pasur reshje asnjëhere të mjaftueshme për hir të së vertetës, nuk jemi në drejtim të vendosjes së fashës për muajin dhjetor, të paktën nga informacionet që unë kam. Megjithatë informacionin e plotë do ta japë ministrja“, deklaroi kryeministri Rama duke ia lënë përgjigjen përfundimtare ministres Belinda Balluku.
Kujtojmë që në muajin shtator Enti Rregullator i Energjisë (ERE) vendosi rritjen e çmimit për fashën mbi 800 KWH në 42 lekë/këh (nga 9.5 që është sot) për periudhën tetor-dhjetor, si një masë për tu përballur me krizën energjetike që erdhi nga çmimet e larta të importit, që kaluan 500 euro/mWh, Kjo masë prekte deri në 12% të familjeve në muajt e dimrit, kur konsumi rritet.
Por nuk vonoi shumë dhe Enti Rregullator i Energjisë (ERE) u tërhoq nga vendimi për vendosjen e fashës në tetor dhe nëntor për shkak të përmirësimit të situatës hidrike që shtoi prodhimin e aftës në vend si dhe uljes së konsumit të energjisë në vend.
