Pas ligjit që u miratua më 21 Korrik të vitit që lamë që do i detyronte studentët e mjekësisë në Shqipëri të punonin në vend të paktën për pesë vite, duke u mbajtur atyre diplomën pas përfundimit të studimeve, këto të fundit u ngritën në protestë. Kjo sepse sipas tyre ishte kundër të drejtave të tyre ku secili individ ka të drejtë të studiojë dhe ta ushtrojë profesionin e tyre ku të dëshirojnë. Ndalimi i protestës nga ana e studentëve erdhi vetëm pasi rektori i Universitetit të Mjekësisë, Arben Gjata u zotua ta presë vendimin e Gjykatës Kushtetuese për kontratën për punësim të detyrueshëm pas përfundimit të studimeve.
“Kemi kërkuar të mos paraqitet asnjë kontratë deri në një vendim përfundimtar të Gjykatës Kushtetuese, dhe kjo u pranua nga rektori”, tha një prej përfaqësuesve që ishte në takim.
Ndërkohë Gjykata Kushtetuese e Republikës së Shqipërisë vendosi me 25 Janar të këtij viti rrëzimin e pjesshëm të nismës së qeverisë për ligjin e studentëve të mjekësisë, specifikisht u shfuqizua detyrimi për punësimin e detyruar në vend për pesë, tre dhe dy vite.
Por ditën e sotme në mbledhjen e Komisionit për Shëndetësinë është përgatitur projektligji për mbajtjen peng të diplomave të studentëve të mjekësisë për 3 vite në mënyrë që ato të ushtrojnë vitet e para të profesionit në Shqipëri. Kjo masë erdhi si pasojë e emigracionit të mjekëve dhe infermierëve në vendet e Europës, kryesisht në Gjermani.
Mbetet për tu parë nëse studentët e mjekësisë do të rikthehen në protestë për të mbrojtur të drejtat e tyre, të cilët qeveria me çdo kusht po tenton të jua mohojë. Kjo sepse propaganda e qeverisë ka dalë në pah. Realiteti është komplet ndryshe nga ajo çfarë qeveria me përfaqësuesit e saj publikon ose deklaron në media të ndryshe. Kjo sepse shifrat e personave që po ikin janë shumë të larta e sipas INSTAT-it mosha që po ikën jashtë vendit janë të rinjtë ose ndryshe të quajtur “truri i një vendi”.
