Një nga debatet më të mëdha pas mbërritjes së koronavirusit në vendin tonë ishte fakti nëse kufijtë duhet të ishin mbyllur më parë apo jo.
Kjo pasi pandemia në çdo vend të botës është përhapur nëpërmjet rasteve të deportuara nga Kina, e më pas zinxhir nga njëri shtet në tjetrin.
Edhe pacienti ‘zero’ në vendin tonë ka patur histori udhëtimi në Firenze prej ku mendohet ta ketë marrë virusin dhe të ketë infektuar persona të tjerë.
Të dhënat e fundit të Insitutit të Statistikave tregojnë se në muajin mars kanë hyrë në territorin shqiptar të paktën 4,793 shtetas italianë.
Në këtë muaj Italia ishte shpallur vatra e dytë më e madhe e koronavirusit në botë, pas Kinës, teksa edhe në 9 mars vendi ynë do zgjohej me dy të infektuar.
Në total sipas INSTAT, hyrjet e shtetasve shqiptarë dhe të huaj në territorin shqiptar, në muajin mars 2020, janë 272,514.
Krahasuar me muajin mars 2019, ky tregues rezulton me rënie me 61,8 %, sepse këtë vit hyrjet e shtetasve të huaj në vend përllogariten tek 95, 321 dhe krahasuar me muajin mars 2019, ky numër ka rënë me 66,4 %.
Numri i shtetasve të huaj të hyrë në vendin tonë përgjatë tre muajve të parë 2020 është 573, 723, duke rënë me 17,5 %, në krahasim me të njëjtën periudhë të vitit 2019.
Në mars 2020, ndër vendet që kanë hyrjet më të larta të shtetasve në Shqipëri, Anglia ka pasur rritjen më të madhe, ndërsa uljen më të ndjeshme e ka pasur SHBA.
Sakaq, daljet e shtetasve shqiptarë dhe të huaj nga vendi, gjatë muajit që lamë pas janë 284, 929.
Në këto kushte, nuk mund të themi me siguri se si kanë ndikuar këto hyrje-dalje në përhapjen e pandemisë në vendin tonë, teksa kujtojmë se Zelanda e Re e cila mbylli kufijtë shumë më shpejt se vendet e tjera e ka përballuar shumë mirë koronavirusin.
Sakaq, në vende si Kina apo Koreja e Jugut të cila mendohet se e mposhtën koronavirusin, me hapjen e kufijve u vu re kthimi i rasteve të reja.
