Në nëntor të vitit 2005, Asambleja e Përgjithshme e Kombeve të Bashkuara shpalli 27 janarin si Ditën Ndërkombëtare të Përkujtimit të Holokaustit, për të nderuar viktimat e shfarosjes naziste.
Ajo deklaroi se “Holokausti, në të cilin u vranë një e treta e popullit hebre dhe anëtarë të panumërt të pakicave të tjera, do t`u shërbejë gjithmonë të gjithë njerëzve si paralajmërim nga rreziku i urrejtjes, intolerancës, racizmit dhe paragjykimit”. Gjermania dhe vende të tjera e kishin përcaktuar atë më parë si ditë përkujtimore.
Kjo datë u zgjodh sepse më 27 janar 1945, Ushtria Sovjetike çliroi kampin e famshëm të Auschwitz-it, një nga vendet më të tmerrshme të historisë, ku u vranë rreth 1,1 milion njerëz, shumica hebrenj.
Kjo ditë shërben për të kujtuar jo vetëm tragjedinë e Hebrenjve, por edhe të grupeve të tjera që ishin viktima të persekutimit nazist, si sintitë, romët, njerëzit me aftësi të kufizuara dhe të tjerë. Përkujtimi i Holokaustit është një mjet për të parandaluar urrejtjen dhe gjenocidet e mundshme në të ardhmen. Sekretari i Përgjithshëm i OKB-së, Kofi Annan, theksoi se kjo kujtesë duhet të mbetet e gjallë për të paralajmëruar rreth rrezikut të intolerancës dhe paragjykimeve.
Në Izrael, kjo ditë përkujtohet në një datë të ndryshme, Yom HaShoa, që bie në prill dhe përkon me kryengritjen e getos së Varshavës në 1943. Në këtë ditë, njerëzit nderojnë viktimat e Holokaustit dhe angazhohen për të kujtuar tragjedinë dhe të mësuar nga të kaluarat e dhimbshme.
Po ashtu, në shumë vende, si në Gjermani, 27 janari shërben si një moment reflektimi dhe përkujtimi, ku zhvillohen aktivitete të ndryshme, përfshirë orë përkujtimore në parlament, ku flasin të mbijetuar të Holokaustit dhe politikanë nga vende të ndryshme, duke dërguar mesazhin e fuqishëm: “Kurrë më!”
