Në vitet 2021 dhe 2022, Bashkia e Himarës realizoi një investim për furnizimin 24 orë me ujë të fshatit Vranisht. Projekti përfshinte ndërtimin e një ujësjellësi të ri, vendosjen e tubacioneve, rrjetin shpërndarës dhe ndërhyrje në burimin ekzistues të ujit. Por, tre vite pas përfundimit, banorët ankohen se uji u vjen me pikatore.
Ekipi i emisionit “Fiks Fare” udhëtoi në Vranisht, me ftesë të banorëve. Në krye të fshatit, pranë depozitave të ujit, banorët rrëfyen se prej kohësh përballen me mungesë të theksuar të furnizimit me ujë. Ata thanë se ujësjellësi i ndërtuar me një kosto prej 1.7 milionë eurosh, bashkë me projektimin dhe mbikëqyrjen, ka dështuar të plotësojë nevojat e tyre.
“Ujësjellësi përfundoi në verën e vitit 2022, por sot kemi ujë vetëm 2 deri në 3 orë në ditë. Disa lagje nuk kanë as aq,” shprehen banorët, të cilët theksojnë se ish-kryetari i Bashkisë Himarë, Jorgo Goro, dhe kreu i Njësisë Administrative Horë-Vranisht u kishin premtuar ujë 24 orë.
Një grua deklaron: “Ku të vemi ne, ku ti çojmë fëmijët që na vijnë për t’u larë. S’kemi ujë, me pikatore. E hapin dhe e mbyllin kur të duan.” Sipas tyre, depozita aktuale është shumë herë më e vogël se ajo e mëparshmja dhe kjo ka ndikuar drejtpërdrejt në furnizimin me ujë.
Nga dokumentet e tenderit të siguruara nga “Fiks Fare”, rezulton se kontrata për ndërtimin e ujësjellësit u zhvillua në vitin 2021 me një vlerë prej 162 milionë lekësh. Fitues u shpall bashkimi i operatorëve ekonomikë “Karl Gega Konstruksion” dhe “Mane\2” shpk.
Gazetarët së bashku me disa banorë inspektuan vendburimin e Vranishtit dhe konstatuan se uji është i pranishëm në burim dhe shpërndahet përmes tre tubave, dy për linjën e re dhe një për atë të vjetrën. Sipas banorëve, investimi i ri është më i keq se ai i mëparshmi.
Në një nga shtëpitë e vizituara, u tregua se uji vjen në sasi shumë të vogël dhe vetëm në orare të caktuara. “Na premtuan ujë 24 orë, por vjen vetëm teprica,” deklaroi banori, duke shtuar se shpesh nuk vjen asnjë pikë.
“Fiksi” takoi edhe administratorin e Njësisë Horë-Vranisht, i cili pranoi se bashkë me ish-kryetarin Goro u kishte premtuar banorëve furnizim të pandërprerë me ujë. Ai tha se deri më tani nuk janë vendosur matësat dhe se ujësjellësi ende nuk është marrë në dorëzim nga Drejtoria e Ujësjellës-Kanalizimeve në Vlorë.
Ai shtoi se janë zhvilluar takime për dorëzimin e rrjetit dhe se vendosja e sahateve do ndihmojë në evitimin e abuzimeve dhe garantimin e ujit 24 orë. Administratori pranoi gjithashtu problematikën me kapacitetin e vogël të depozitës, ndërsa shtoi se vitin e kaluar zona u vizitua nga drejtori i AKUK-ut me qëllim funksionalizimin e sistemit.
Banorët e Vranishtit vijojnë të kërkojnë zgjidhje, ndërsa për momentin jetojnë me mungesë elementare të një prej nevojave më bazike: ujit!
