Operacioni Ndërkombëtar i Monitorimit ka rënë dakord me zgjatjen e mandatit të Komisionit të Pavarur të Kualifikimit, për të vazhduar Vettingun për gjyqtarët dhe prokurorët në Shqipëri. ONM e konsideron me rëndësi parësore që të përfundojnë të gjitha rastet e verifikimit dhe për këtë është e nevojshme një zgjatje e kufizuar në kohë e mandatit kushtetues të KPK.
Më tej, ONM rekomandon konsultim të ngushtë me aktorët përkatës, ndër to edhe Komisioni i Venecias.
“Në përputhje me mandatin e monitorimit që i është dhënë ONM-së nga Kushtetuta e Shqipërisë, ONM konsideron se është me rëndësi parësore që të përfundojnë të gjitha rastet e verifikimit në pritje në periudhën më të shkurtër të mundshme kohore, duke ruajtur konsistencën dhe integritetin e procesit. Për të arritur këtë rezultat, është e nevojshme një zgjatje e kufizuar në kohë e mandatit kushtetues të anëtarëve të Komisionit të Pavarur të Kualifikimit dhe të Institucionit të Komisionerëve Publikë. Kjo do t’i lejojë dy organet të përfundojnë të gjitha rastet në të cilat ka filluar hetimi. Është në kompetencën e autoriteteve shqiptare të përcaktojnë afatet e sakta të një shtrirjeje të tillë, në konsultim të ngushtë me aktorët përkatës, përfshirë Komisionin e Venecias”, thuhet në deklaratën e Operacionit Ndërkombëtar të Monitorimit.
Mandate i KPK përfundon në qershor të vitit 2022 dhe për këtë arsye manzhoranca, konkretisht Taulant Balla ka kërkuar bashkëpunim nga opozita për zgjatjen e mandatit. Duke qenë se diçka e tillë kërkon ndryshime edhe në Kushtetutë, duhen të paktën 94 vota për t’u miratuar.
