Janë zbardhur detaje të reja në lidhje me vrasjen e 23-vjeçarit Renis Dobra, një ngjarje që ndodhi më 8 korrik dhe tronditi opinionin publik.
Sipas burimeve zyrtare, Policia ka konfirmuar përmes pamjeve filmike dhe provave të mbledhura se në rrëmbimin e të riut kanë marrë pjesë katër persona: Fatjon Bushgjoka (i arrestuar), Aleksandër Bushgjoka, Kristi Bushgjoka dhe Petrit Çakrri.
Hetimet kanë zbuluar se Aleksandër Bushgjoka ka arritur të largohet nga Shqipëria përmes kufirit me Kosovën më 9 korrik, një ditë pas krimit, kur ende nuk ishte shpallur në kërkim. Po ashtu, ekzistojnë dyshime të forta se edhe Kristi Bushgjoka ka ndjekur të njëjtën rrugë dhe aktualisht dyshohet se fshihet në Kosovë.
Edhe Petrit Çakrri ka kaluar përmes Kosovës dhe është ndaluar disa ditë më vonë në hyrje të Tropojës, ku u arrestua nga policia shqiptare.
Autoritetet shqiptare janë në bashkëpunim të ngushtë me forcat e rendit në Kosovë për lokalizimin dhe arrestimin e dy të dyshuarve të tjerë.
Hetuesit po ndjekin si pistë kryesore një konflikt për lëndë narkotike të ndodhur më parë në Gjermani, midis viktimës dhe vëllezërve Bushgjoka. Megjithatë, nuk përjashtohet mundësia që ata të kenë vepruar me porosi nga persona të tretë, të përfshirë në trafikun e drogës.
Si ndodhi ngjarja
Më 9 korrik, trupi i 23-vjeçarit Renis Dobra u gjet pranë liqenit të Shkopetit, pasi babai i tij kishte bërë kallëzim për zhdukjen e tij, pasi kishte humbur kontaktet. Nga hetimet paraprake dyshohet se i riu është ndjekur dhe dhunuar përpara se të vritej.
Sipas policisë, autorët e dyshuar – Fatjon Bushgjoka (i arrestuar), Aleksandër Bushgjoka, Kristi Bushgjoka dhe Petrit Çakrri, mund ta kenë vrarë të riun dhe më pas e kanë transportuar trupin së bashku me automjetin, për ta hedhur në liqen, me qëllim fshehjen e provave.
