Një ngjarje e rëndë ka ndodhur ditën e djeshme në Ishull Lezhë, ku u qëllua për vdekje nënkomisari, Saimir Hoxha nga 21-vjeçari Aldi Rama. Është lajmëruar se ditën e sotme do të zhvillohen homazhe për nënkomisarin në Pallatin e Kongreseve, nga ora 12:00 deri në orën15:00.
Kujtojmë se ditën e djeshme ministri i Brendshëm, Bledi Çuçi ka deklaruar se kanë nisur procedurat për shpalljen “Dëshmor i Atdheut” të nënkomisarit Saimir Hoxha.
“Komisioni Qendror i Statusit ‘Dëshmor i Atdheut’ ka nisur procedurat për shpalljen e oficerit Saimir Hoxha, ‘Dëshmor i Atdheut’ duke i garantuar familjes së tij të gjithë vëmendjen dhe mbështetjen e dhënë me ligj të posaçëm”, deklaroi ministri i Brendshëm.
Nënkomisari Saimir Hoxha ishte pjesë e grupit të kontrollit të territorit, për evidentimin dhe asgjësimin e lëndëve narkotike. Ai u qëllua për vdekje nga 21 vejçari në momentin që ndaloi një makinë të dyshimt për kontroll. Kujtojmë se Aldi Rama ka qenë edhe më parë i dënuar dhe sipas informacioneve ai duhet të ishte në arrest shtëpie. Pasi qëlloi nënkomisarin ai arriti të largohej nga vendi i ngjarjes për t’u neutralizuar më vonë nga policia në një zonë të pyllëzuar shumë afër vendit të krimit.
Grupi i posaçëm hetimor, nën drejtimin e Prokurorisë po vijon hetimet intensive për zbardhjen dhe dokumentimin e gjithë detajeve të kësaj ngjarje të rëndë, që ka prekur dhe shokuar mbarë opinionin publik.
