Pas tragjedisë së vrasjes së 14-vjeçarit Martin Cani pranë shkollës “Fan Noli” në Tiranë, Partia Demokratike (PD) ka kërkuar një interpelancë urgjente me ministren e Arsimit, Ogerta Manastirliu.
PD e konsideron ngjarjen si një pasqyrë e rëndë e mungesës së sigurisë në shkolla dhe një dëshmi të nevojës për mbështetje psikologjike për nxënësit.
Në kërkesën për interpelancë, PD thekson se vrasja e 14-vjeçarit tregon se shumë shpejt mund të ndodhin më shumë incidente të ngjashme, duke nënvizuar rëndësinë e përmirësimit të sigurisë në shkolla.
Po ashtu, ata kritikojnë dështimin e implementimit të “Paketes së Sigurisë”, e cila ishte propozuar më shumë se një vit më parë nga Ministria e Brendshme, por që ende nuk është miratuar nga Kuvendi.
Paketa e Sigurisë, e publikuar në tetor 2023, përfshin masa të ashpra për parandalimin e veprave penale në shkolla. Propozimi parashikon dënime më të rënda për dhunën seksuale, pornografinë, trafikimin e të miturve, mbajtjen dhe prodhimin e armëve, si dhe për përdorimin e drogës në ambientet shkollore.
Përveç kësaj, propozohet që mbajtja e armëve të ftohta të dënohet me burgim nga 3 deri në 6 vjet, në vend të dënimeve aktuale që përfshijnë gjobë deri në 3 vjet.Megjithatë, paketa ka mbetur e bllokuar për shkak të një iniciative të Ministrisë së Drejtësisë për ndryshime në Kodin Penal, gjë që ka penguar avancimin e saj në Kuvend.
Në rast se kërkesa për interpelancë pranohet, deputetja Ina Zhupa, e cila është gjithashtu kryetare e Komisionit të Medias, do të drejtojë diskutimin përfaqësues të PD-së.
“Qeveria ka propaganduar të ashtuquajturën “Paketa e Sigurisë në Shkolla” që do të identifikonte rreziqet, do të rriste sigurinë, jo vetëm brenda shkollës, por edhe ne perimetrin e sigurisë jashtë shkollave. Oficer të trajnuar duhet të merreshin me këtë çështje dhe do ishte sipas qeverisë prioritet i MAS. Në shtator të këtij viti kryeministri është shprehur se “oficeri i sigurisë duhet të jetë në vend të prindërve, që duhet të njohë çdo nxënës dhe problematikat e tyre, që ata të ndihen dhe të jenë të sigurt në institucionet arsimore”. Ndërsa për të vlerësuar situatën psikologjike të fëmijës, është vendosur edhe figura e psikologut në shkolla”, thuhet në kërkesën e PD.
