Vjedhjet nga koncesionet/ Basha publikon shifrat: Ja sa milionë euro mori “Check up” për shërbime të pakryera

Kreu demokrat Lulzim Basha ka publikuar sot një tjetër dështim të kundërshtatit të tij politik, kryeministrit Edi Rama. 

Në kuadër të fushatës “100 Dështimet e Qeverisë”, Basha në rrjetin social “Instagram”, ka publikuar shifrat për konçesionin e “Check Up-it”.  

Me anë të një “instastory” Basha  thekson se sipas Kontrollit të Lartë të Shtetit koncesioni i “Check up-it” ka marrë 6 milionë euro për shërbime të pakryera.

“ 6milionë euro sipas KLSH-së. PPP-të po thithin fondet për shëndetësinë, duke lënë spitalet pa investime dhe mjekë pa rritje pagash.”, thuhet në videomesazhin e publikuar nga lideri opozitar, Lulzim Basha. 

Vetëm një muaj e pak ditë larg zgjedhjeve, lideri opozitar një pjesë të fushatës e ka zhvendosur në rrjetet sociale. 

Gjithashtu Basha ka zhvilluar shumë takime në qytete të ndryshme, ku në shumicën prej tyre takimet janë zhndërruar në mitingje elektorale. 

Përmendim këtu Kavajën, Shkodrën, Gjirokastrën e sëfundmi dhe Beratin.  Grumbuj qytetarësh pa maska e pa distancë sociale kanë bërë që këto takime të krijojnë rrezik të shtuar në kohë pandemie.

Postimi i Lulzim Bashës: 

“34 ditë deri më 25 prill. 100 dështimet e Ramës në tetë vite. Cila është shuma që koncesioni i “Check up-it” ka marrë për shërbime të pakryera? Përgjigjja: 6 milionë euro sipas KLSH-së. PPP-të po thithin fondet për shëndetësinë, duke lënë spitalet pa investime dhe mjekë pa rritje pagash.”