Në agimin e së dielës, një sulm me raketa i ndërmarrë nga Irani shënoi fillimin e një dite tragjedie për dhjetëra familje në Izrael.
Goditja e parë ra në Tamra, një qytet arab-izraelit pranë Haifas, duke vrarë katër gra të një familjeje, Manar Khatib, 45 vjeçe, vajzat e saj Shada (20) dhe Hala (13), si dhe një të afërt me të njëjtin emër, Manar Khatib.
Shtëpia e tyre trekatëshe u rrëzua nga një raketë në errësirën e mëngjesit. Pamje të buzëqeshura të familjes gjatë një pushimi në Alto Adige, të publikuara më herët nga disidenti palestinez Ahmed Fouad Alkhatib, e bënë edhe më të dhimbshme ndarjen.
“Kam humbur lulet më të bukura të jetës sime,” deklaroi për Ynet Raja Khatib, bashkëshorti i Manarit dhe babai i vajzave, duke shtuar se kishte arritur të shpëtonte vetëm vajzën më të vogël, Razan.
Shada ishte studente e Jurisprudencës dhe angazhohej në Klinikën për të Drejtat e Njeriut.
Vdekja e saj u konsiderua një humbje e madhe për komunitetin. Fqinjët treguan se shpërthimi ishte aq i fortë sa që për pak sa nuk shkëputi derën e strehës. Një prej tyre pa vajzën e shpëtuar në gjendje shoku, e vetme në çatinë e rrënojave.
Tamra, me mbi 37 mijë banorë dhe pa strehë publike, u kthye në simbol të çmimit të lartë të një përgatitjeje të munguar.
Kryetari i partisë Hadash-Ta’al, Ayman Odeh, reagoi ashpër: “Ky është çmimi i papërgjegjshmërisë, përveç atij të luftës.”
Presidenti izraelit Isaac Herzog kërkoi unitet, duke deklaruar se “raketat nuk bëjnë dallim mes hebrenjve, myslimanëve apo të krishterëve”.
Deri tani, numri zyrtar i viktimave ka arritur në 13, por autoritetet paralajmërojnë se mund të rritet.
Në Bat Yam, nga një tjetër sulm të shtunën në mbrëmje, gjashtë persona humbën jetën, dhe shtatë të tjerë dyshohet se ndodhen ende nën rrënoja.
Mes viktimave janë edhe pesë shtetas ukrainas, përfshirë tre fëmijë, një vajzë 8 vjeçe, një djalë 10 vjeç dhe një tjetër 18-vjeçar.
Emrat e viktimave vazhdojnë të shtohen. Efrat Saranga, 44 vjeçe, u konfirmua e vdekur mbrëmjen e djeshme. Ndër viktimat janë edhe të moshuar: Yevgenia Blinder (60), Eti Cohen Engel (74) dhe Yisrael Aloni (73).
Ky i fundit, baba i tre fëmijëve dhe gjysh, u qëllua nga një shpërthim në Rishon Lezion. Djali i tij, Eran, tregoi se i ati ndodhej vetëm në një apartament nëntokësor pa strehë të mbrojtur, kur u godit për vdekje nga copa betoni.
Në të njëjtin goditje, humbi jetën edhe kujdestarja e një banese aty pranë, Yevgenia Blinder, si dhe Eti Cohen Engel në qytetin e afërt Ramat Gan.
“Ishte një nënë e bukur, gjithmonë me buzëqeshje,” tha vajza e saj, Nurit. Partneri i saj ndodhet në spital në gjendje kritike.
Në një tjetër rrëfim rrëqethës, Ribat Vaknin për Channel 12 tha se babai i tij nuk arriti dot në kohë në strehë: “Goditja ishte e fuqishme. Vëllai im u plagos, edhe qeni. Tani po kërkojnë babain tim.”
Izraeli është përballë një valë dhimbjeje, ndërsa kërkimet për të zhdukurit vazhdojnë, e plagët e kësaj goditjeje të paprecedentë thellohen.
