Temperaturat e larta të verës dhe qëndrimi i zgjatur në plazh, sidomos pa kujdesin e duhur, mund të kthehen në burim sëmundjesh për lëkurën.
Dermatologia Violeta Dajçi, në një intervistë për Report Tv, thekson se gjatë sezonit të nxehtë, rritet ndjeshëm rreziku për shfaqjen e problemeve dermatologjike, të cilat variojnë nga alergjitë dhe irritimet, deri te infeksionet më serioze.
Sipas saj, “mund të jenë infeksione bakteriale, virale, mykotike, ndonjëherë edhe infeksione të tjera parazitoze që kalojnë nga një person te një tjetër për shkak të kontakteve që mund të kemi. Patologji të tjera që janë të shpeshta në këtë periudhë janë edhe alergjitë e ndryshme që ndodhin kryesisht nga ekspozimi në diell”.
Dajçi nënvizon se fëmijët përbëjnë një kategori veçanërisht të rrezikuar për infeksione të lëkurës, të cilat shpesh shfaqen në formë skuqjesh apo njollash të kuqe, me potencial për t’u përhapur dhe për t’u bërë ngjitëse.
“Ato fillojnë si pika të vogla dhe më pas shfaqen në trajtën e hartave rrumbullake që vijnë e përhapen, e më pas zgjerohen. Mund të marrin edhe gjithë sipërfaqen e lëkurës ose mund të kalojnë shumë shpejt nga një person te tjetri. Duhet të trajtohen shumë mirë, pasi përveç përhapjes, mund të lënë edhe shenja në lëkurën e fëmijëve që është e vështirë të largohen më pas.”
Në lidhje me masat mbrojtëse, dermatologia këshillon higjienën personale dhe shmangien e përdorimit të përbashkët të sendeve personale si peshqirët apo shapkat.
“Shpëlarja gjëja e parë e më pas do thoja ndërrimin e peshqirëve, ose atyre që mund të kenë përdorur edhe persona të tjerë. Do ishte mirë që mos përdoren edhe shapkat e njëri-tjetrit sepse edhe këto janë mbartëse të këtyre infeksioneve mykotike”, thotë Dajçi.
Në rrjetet sociale janë përhapur opinione që hedhin dyshime mbi përdorimin e kremrave mbrojtës ndaj diellit, por specialistja i kundërshton këto teori.
“Edhe ato duhen përdorur, siç themi në gjuhën popullore, me ‘karar’. Shpesh dëgjojmë në rrjetet sociale apo bëhen trend nga blogerët, shkencërisht nuk është vërtetuar, që produktet apo edhe kremrat që mbrojnë nga rrezatimi diellor kanë veti kancerogjene. Në mënyrë kategorike kjo nuk është e vërtetë. Kjo ndodh kur kremrat përdoren më shpesh se sa duhet, kur abuzohet me kremrat, kur përdoren kremra që karakterizohen jo të mirë”, shprehet ajo.
Megjithëse uji i detit është i njohur për vetitë e tij terapeutike, Dajçi paralajmëron se papastërtitë në ujë, veçanërisht në praninë e plagëve të hapura, mund të shkaktojnë infeksione.
Kujdesi për lëkurën gjatë stinës së verës mbetet thelbësor, veçanërisht për grupet më të ndjeshme si fëmijët. Ekspertët apelojnë për më shumë vëmendje ndaj higjienës, mbrojtjes nga dielli dhe përdorimit të kremrave cilësorë në mënyrë të kontrolluar.
