Ditën e sotme në Bruksel ka nisur Samiti dyditor i 27 vendeve anëtare të Bashkimit Europian, ku do diskutohet mbi procesin e zgjerimit dhe çeljes së negociatave të anëtarësimit me Bashkimin Europian. Pjesëmarrës në samit është edhe presidenti i Serbisë, Vuçiç, i cili është vendosur me “shpatulla pas murit” nga mediat e vendeve të ndryshme të rajonit.
I pyetur nëse pret që të përballet me kritika në Samit, duke marrë në konsideratë faktin se nuk ka vendosur sanksione ndaj Rusisë, Vuçiç u shpreh se është mëse i gatshëm për gjithçka. Ai shtoi se Serbia është ulur në vendin e saj dhe se politikën e vendit e përcaktojnë qytetarët nëpërmjet lidershipit të tyre.
“E pres apo jo, do të marrë një përgjigje”, u shpreh Vuçicc, i pyetur nga një gazetar nga Kroacia se si e sheh faktin që kryeministri dhe presidenti i Kroacisë deklaruan më herët se Serbia nuk mund të ulet më në dy karrige.
“Serbia është ulur në karrigen e saj dhe nuk është kryeministri juaj dhe presidenti juaj ata që do ta udhëheqin politikën e Serbisë, por qytetarët e Serbisë përmes lidershipit të tyre. Por unë i përgëzoj për faktin se do të dëshironin shumë të udhëhiqnin politikën e Serbisë. Kjo tregon rëndësinë e Serbisë dhe i uroj gjithë të mirat”, tha Vuçicc.
I pyetur për të komentuar faktin se kancelari gjerman Olaf Scholz tha më herët se pret që Serbia ta njohë Kosovën, Vuçicc u përgjigj shkurt: “Edhe unë i thashë që mos të presin hiç për këtë”.
