Tiranë, 27 Qershor 2024 – Mësuesja dhe aktivistja Ina Kasimati, e cila u nda nga jeta për shkak të kancerit, ka lënë pas një letër të fuqishme akuze ndaj gjendjes së Spitalit Onkologjik në QSUT. Letra e saj, e shkruar pak para se të ndërronte jetë, është bërë virale këto ditë, duke ngritur shqetësime të mëdha mbi cilësinë e shërbimit shëndetësor në Shqipëri.
Në letrën e saj, Kasimati përshkruan përvojën e saj të vështirë dhe zhgënjimin e thellë me trajtimin që mori. “Unë kur u diagnostikova me kancer gjiri para 4 vitesh, operacionin e bëra te Spitali Onkologjik në QSUT. Jam operuar (unë dhe shumë pacientë) në një krevat me tre këmbë dhe m’u hoqën të gjitha limfonodulat pasi kështu ishte aparatura,” shkruan ajo, duke treguar kushtet e papranueshme në spital.
Kasimati thekson se trajtimi i saj nuk iu dha sipas protokollit të duhur dhe se ajo e kuptoi këtë vetëm kur u vizitua në Itali. “Kur u ktheva dhe ia thashë Dr.Dhuratës, ajo më tregoi listën e pacientëve që prisnin prej disa muajsh të merrnin Zoladexin,” shkruan Kasimati, duke theksuar se mungesa e ilaçeve ishte një problem i përhapur.
Ajo përmend edhe përpjekjet e saj të pafrytshme për të marrë ndihmë nga autoritetet. “I shkruajta Drejtorit të përgjithshëm z.Enkelejd Joti. Asnjë përgjigje. I shkruajta ministres, znj.Manastirliu. Asnjë përgjigje,” tregon Kasimati, duke shtuar se vetëm pas kontaktit me kryeministrin, ajo mori një përgjigje, megjithatë e papërshtatshme.
Në letrën e saj, Kasimati denoncon kushtet e tmerrshme të spitalit, mungesën e privatësisë dhe mungesën e pajisjeve dhe ilaçeve thelbësore. “Ndërsa në dhomën e vogël të onkologes ku shkoja çdo tre muaj për ironi pas Covid-it ishin dy mjekë, që thjesht mbushnin kartelën dhe ikja bëja terapinë. Asnjë krevat në dhomë, as stetoskop, as privatësi të komunikoje me doktorin,” shkruan ajo.
Kasamatin e tronditi edhe një fotografi nga një kishë në Voskopojë me një varr në oborr, e cila ishte vendosur në katin e parë të spitalit si pjesë e një reklame të një firme farmaceutike. “Kur e kam parë jam tmerruar. I bëra foto. Ia dërgova drejtorit, e postova edhe në faqen time në FB dhe më pas u hoq,” shkruan ajo.
Kasamati përfundon letrën e saj me një akuzë të rëndë ndaj sistemit shëndetësor shqiptar dhe thirrje për ndryshim. “Një pacient që derdh sigurimet shëndetësore nuk ka pse t’i shkruajë drejtorit, ministrit, kryeministrit… Është turp! Në cilin vend të Europës ndodh kjo?” pyet ajo, duke theksuar se shërbimi shëndetësor duhet të jetë një e drejtë e garantuar për të gjithë qytetarët.
Letra e Ina Kasamatit ka ngjallur debat të madh dhe ka theksuar nevojën urgjente për reforma në sistemin shëndetësor në Shqipëri.
