Temperaturat e larta të ditëve të fundit kanë ndikuar ndjeshëm në përkeqësimin e gjendjes shëndetësore të fëmijëve, duke shtuar ndjeshëm fluksin e vizitave në poliklinikat pediatrike.
Çdo mjek pediatër në qendrat shëndetësore përballet mesatarisht me 20 deri në 30 raste në ditë.
Sipas specialistëve, rastet më të shpeshta gjatë kësaj periudhe lidhen me gastroenteritet, infeksione të aparatit tretës që nxisin të vjella, diarre dhe temperaturë.
Pediatrja Sonila Brati tregon se problematikat lidhen ngushtësisht me stilin e jetesës në verë dhe zakonet ushqimore të fëmijëve:
“Për shkak të temperaturave të larta, konsumimit nga ndonjë ushqim, konsumimi i akulloreve, vajtja e tyre në plazh bën që gastroenteritet në verë të shtohen më tepër”, tha Brati.
Mjekja bën apel për kujdes të shtuar me ushqimin, duke theksuar rëndësinë e gatimit në kushte shtëpie dhe shmangien e produkteve të mbajtura për kohë të gjatë në frigorifer.
“Duhen kryesisht gjëra të bëra në shtëpi dhe jo të mbajtura gjatë në frigorifer. Konsumimi i sa më shumë lëngjeve, është një gjë shumë e rëndësishmë të theksohet qoftë te fëmijët e vegjël fare por edhe tek moshat më të rritura”, – shton ajo.
Përveç fëmijëve, edhe të moshuarit dhe personat me sëmundje kronike janë veçanërisht të ndjeshëm gjatë ditëve të nxehta.
Mjekët rekomandojnë që të shmangen daljet gjatë orëve të pikut dhe qëndrimi të jetë i kufizuar në ambiente të freskëta e të ajrosura mirë.
