Provinca e Albertas në Kanada ka raportuar viktimën e parë për shkak të mpiksjes së gjakut, pas vaksinimit AstraZeneca. Kanadaja ka raportuar të paktën pesë raste të mpiksjes së gjakut pas vaksinimit, por zyrtarët e shëndetit publik thonë se përfitimet e vaksinës i tejkalojnë efektet anësore.
Gruaja e ndjerë, në të 50-at, është rasti i dytë që ka zhvilluar mpiksje gjaku dhe viktima e vetme e regjistruar pas më shumë se 253,000 doza të vaksinës AstraZeneca që janë administruar në provincë, tha kryetari i Alberta. Kanadaja ka regjistruar 1,243,242 raste dhe 24,342 viktima që nga fillimi i pandemisë.
Rreth dy javë më parë, Danimarka u bë vendi i parë që pezulloi AstraZeneca. Instituti shëndetësor i Norvegjisë rekomandoi që Oslo të ndiqte shembullin e Kopenhagenit dhe të ndalonte përdorimin e vaksinës.
Ndërkohë, Britania e Madhe, e cila është mbështetur te AstraZeneca për vaksinuar popullsinë deri më tani, ka vazhduar përdorimin e saj, pavarësisht se rregullatori i barnave në vend deklaroi në fillim të Prillit se 19 persona që kishin marrë vaksinën kishin vdekur nga mpiksjet e gjakut.
Shumë vende zgjodhën të pezullojnë përdorimin e AstraZeneca në mars, pavarësisht deklaratave nga Agjencia Europiane e Barnave (EMA) dhe Organizata Botërore e Shëndetësisë (OBSH) se përfitimet e vaksinës tejkalojnë rreziqet. Në vlerësimin e saj, EMA nuk identifikoi një shkak të caktuar për këto raste shumë të rralla, por tha se ekziston një lidhje e mundshme me vaksinën dhe kërkoi që ato të renditen si një efekt anësor jashtëzakonisht i rrallë.
Para se të pezullohej AstraZeneca për shkak të shqetësimeve për mpiksjen e gjakut, të gjitha vendet europiane përveç Francës, besonin se vaksina ishte e sigurte. Por ky nuk ishte rasti në Mars me Francën, Gjermaninë, Spanjën dhe Italinë, ku shumica e qytetarëve ishin skeptikë ndaj vaksinës.
