Ish-shefi i Qarkullimit Rrugor të Tiranës, Roven Zeka, ka paraqitur një kërkesë për ndryshim të masës së sigurisë nga “arrest me burg” në një masë më të butë, pas një incidenti të ndodhur në qelitë e paraburgimit.
Zeka është rrëzuar në ambientet e burgut dhe ka pësuar dëmtime në pjesën e legenit. Seanca për shqyrtimin e kërkesës së tij pritet të zhvillohet sot, në orën 13:00, në Gjykatën e Posaçme kundër Korrupsionit dhe Krimit të Organizuar.
Zeka ndodhet në qendër të një hetimi të SPAK, që lidhet me një aferë korrupsioni për një aksident rrugor të shkaktuar nga bashkëshortja e biznesmenit Erges Vrioni.
Sipas akuzës, ai, bashkë me shefin e hetimit të aksidenteve, Sokol Novaku, dhe oficerin Edison Tabaku, kanë përfituar një ryshfet prej 2 mijë euro për të ndikuar në ecurinë e hetimeve dhe për të shmangur ndalimin e Anisa Vrionit, autore e aksidentit.
Tabaku, i cili kishte njohje me biznesmenin, ka qenë ndër personat që ndërmjetësuan dhe kërkuan shumën për të ndikuar në procedurat.
SPAK i ka dokumentuar akuzat përmes përgjimeve dhe bisedave të përgjuara, ku konfirmohet edhe pagesa e bërë.
Zeka, Tabaku dhe Novaku u arrestuan më 19 prill, në kuadër të këtij hetimi. Ndërsa Apeli i GJKKO ka lënë në fuqi masën “arrest me burg” për Zekën dhe Tabakun, për Novakun është vendosur “arrest shtëpie”, për shkak të rrethanave familjare.
