Një ngjarje e rëndë ka tronditur qytetin e Elbasanit, ku një fëmijë 6-vjeçar është gjetur i mbytur në lumin Shkumbin, në lagjen “Çezme”.
Vogëlushi ishte shpallur i humbur prej disa orësh, ndërsa trupi i tij u zbulua pa shenja jete rreth orës 21:30 të së martës.
Sipas njoftimit zyrtar nga Policia, rreth orës 19:50 të datës 10 qershor, një grua me inicialet D. A. njoftoi për zhdukjen e nipit të saj të mitur, me të cilin nuk kishte më kontakte prej më shumë se tre orësh.
Menjëherë pas sinjalizimit, forcat policore nisën kërkimet në zonë, të cilat përfunduan tragjikisht.
Nga këqyrja paraprake e trupit të fëmijës nuk janë konstatuar shenja dhune, ndërsa hetimet e deritanishme çojnë në dyshimin se bëhet fjalë për një mbytje aksidentale në lumë.
Materialet për rastin janë referuar në Prokurorinë e Elbasanit për ndjekje të mëtejshme ligjore.
