Gjykata e Shkodrës ka dhënë masën “arrest me burg” për dy punonjësit e burgut të Reçit, Arnaldo Hoxha dhe Mario Laloshi, që të dy me funksionin specialist-psikolog në sektorin e çështjeve shoqërore pranë IEVP Reç në Shkodër. Në një video të shfaqur në emisionin investigativ “Stop”, dy punonjësit u shfaqën duke marrë ryshfet për një të burgosur për t’i zëvendësuar kohën e mbetur të dënimit me arrest shtëpie ose shërbim prove. Avokati mbrojtës kërkoi detyrim paraqitje për këta shtetas, por gjykata vendosi arrest me burg. Fillimisht ministri i drejtësisë pas videos se shfaqur urdhëroi shkarkimin e dy punonjësve nga detyra ndërsa më pas Shërbimi i Kontrollit të Brendshëm në sistemin e burgjeve bëri arrestimin e tyre. Sot dy të arrestuarit të dyshuar për korrupsion dolën para Gjykatës së Shkallës së Parë në Shkodër e cila i la me masën e sigurisë “arrest me burg”.
Mario Latoshi është përgjegjës për kontaktet e të burgosurve me familjarët. Ndërsa Arlando Hoxha ndikon në raport-vlerësimin e sjelljes së të burgosurve, kur këta të fundit kërkojnë, që koha e mbetur e vuajtjes së dënimit, t’i konvertohet në arrest shtëpie apo shërbim prove.
Arrestimi i këtyre dy personave është bërë dy ditë më parë, pas një denoncimi në emisionin Stop, ku bashkëshortja e Martin Tushes, i cili vuan dënimin në Reç i akuzoi për korrupsion. Sipas bashkëshortes, Martinit i takojnë të gjitha këto vlerësime lehtësuese, por gjërat bëhen enkas të vështira, për të zhvatur para.
