Presidenti amerikan Donald Trump ka paralajmëruar vendosjen e tarifave të reja për importet nga disa vende, përfshirë edhe dy shtete të Ballkanit Perëndimor: Serbinë dhe Bosnje e Hercegovinën.
Sipas njoftimit të bërë publik të hënën në platformën Truth Social, tarifat për Serbinë do të jenë 35%, ndërsa për Bosnje e Hercegovinën 30%, dhe do të hyjnë në fuqi më 1 gusht.
Këto tarifa janë më të ulëta se ato që ishin propozuar fillimisht në prill, 37% për mallrat nga Serbia dhe 35% për ato nga Bosnja, por që u shtynë për 90 ditë.
Trump ka dërguar letra zyrtare përkatësisht presidentit serb Aleksandar Vuçiq dhe kryetares së presidencës së Bosnje e Hercegovinës, Zhelka Cvijanoviq, ku njofton vendimin dhe thekson angazhimin e SHBA-së për vazhdimin e marrëdhënieve tregtare, pavarësisht, siç theksohet në letër, “deficitit të konsiderueshëm tregtar”.
Trump nënvizon se tarifat aktuale janë më të ulëta nga sa do të nevojiteshin për të balancuar tregtinë, duke shtuar se çdo përpjekje hakmarrjeje nga këto shtete do të përballet me tarifa të shtuara nga ana e SHBA-së.
Lista e vendeve që do të preken nga tarifat e reja përfshin gjithashtu Japoninë, Korenë e Jugut, Malajzinë dhe Kazakistanin me 25%; Afrikën e Jugut me 30%; Indonezinë me 32%; Bangladeshin me 35%; Kamboxhën dhe Tajlandën me 36%; si dhe Laosin dhe Mianmarin me 40%.
Në fillim të prillit, SHBA vendosi një tarifë prej 10% për mallrat nga Kosova, ndërsa masa të ngjashme u vendosën edhe për Shqipërinë, Maqedoninë e Veriut dhe vendet e tjera të rajonit.
Ekspertët kanë paralajmëruar se këto masa do të kenë ndikim të ndjeshëm, sidomos në vende me varësi të lartë nga importet si Kosova.
Presidentja e Kosovës, Vjosa Osmani, ka deklaruar se zyra e saj ka përgatitur një projektligj për heqjen e tarifës ndaj produkteve amerikane, por miratimi i tij varet nga konstituimi i Kuvendit të ri, proces i cili vijon të mbetet i bllokuar pavarësisht zgjedhjeve të mbajtura pesë muaj më parë.
