Presidenti amerikan Donald Trump ka dhënë miratimin paraprak për një sulm të mundshëm ndaj Iranit, por ende nuk ka marrë një vendim përfundimtar.
Sipas burimeve të CBS News, ai po pret nëse Teherani do të tërhiqet nga ambiciet e tij bërthamore, përpara se të ndërmarrë një veprim ushtarak.
Në shënjestër të mundshme është objekti nëndheshëm i pasurimit të uraniumit në Fordo, një nga pikat kyçe të programit bërthamor iranian. Trump ka bërë thirrje për një “dorëzim të pakushtëzuar” nga ana e Iranit, kërkesë që është hedhur poshtë prerazi nga udhëheqësi suprem i vendit, Ayatollah Ali Khamenei.
“Një ndërhyrje ushtarake nga SHBA do të ketë pasoja të rënda,” paralajmëroi Khamenei, duke shtuar se populli iranian nuk do të nënshtrohet.
“E kam në dorë ta bëj, por mund të mos e bëj,” tha Trump në një deklaratë për mediat. “Askush nuk e di çfarë do të bëj,” shtoi ai më tej, duke lënë të hapur mundësinë për çdo skenar.
Situata është tensionuar edhe më shumë në terren. Izraeli ka intensifikuar sulmet ndaj objektivave ushtarake dhe bërthamore në Iran. Si kundërpërgjigje, Teherani ka lëshuar raketa hipersonike, edhe pse deri tani nuk raportohen dëme të mëdha në territorin izraelit.
Bilanci i përgjakshëm vazhdon të rëndohet. Autoritetet iraniane raportojnë për 585 viktima nga sulmet izraelite, mes tyre 239 civilë.
Nga ana tjetër, rreth 400 raketa iraniane kanë goditur Izraelin, duke shkaktuar vdekjen e 24 personave, të gjithë civilë, sipas autoriteteve izraelite.
Retorika agresive është kthyer në zjarr të hapur, ndërsa bota mban frymën për një përshkallëzim edhe më të rrezikshëm.
