Në disa prej institucioneve më të rëndësishme të vendit kanë nisur rotacionet dhe duket se pozicionet drejtuese nuk i janë besuar specialistëve të fushës, por të besuarve të Partisë Socialiste.
Pak ditë pasi u lirua nga detyra, ish-zv.ministri i Infrastrukturës, Hantin Bonati, u emërua në krye të një institucioni mjaft të rëndësishëm. Hantin Bonati tashmë do të zëvëndësojë Mina Kustën si drejtor i ri i Albcontrol. Bonati ishte emëruar në detyrën e zv.ministrit të Infrastrukturës në vitin 2017.
Lëvizje do të ketë edhe në institucione të tjera të rëndësishme të vendit. Ergys Verdho, nuk do të jetë më kreu i ARRSH, por tashmë do të jetë drejtor i KESH, post i cili më parë mbahej nga Benet Beci, që është zgjedhur deputet. Në vend të Verdhos në ARRSH do të shkojë Evis Berberi.
Të tre drejtorët e emëruar në institucionet përkatëse, janë persona të afërt me ministren e Infrastrukturës, Belinda Balluku. Pas grevës së kontrollorëve të AlbControl, duket se ministrja do të vendosë kontroll në krye të institucionit që dikur e drejtonte vetë, duke emëruar një zv.ministër të saj.
Po ashtu Ergys Verdho është një nga personat e besuar të Ballukut në drejtimin e tij të ARRSH. Nga ana tjetër, Evis Berberi ka qenë këshilltari i Belinda Ballukut në Ministrinë e Infrasturkturës.
