Lëvizja Socialiste për Integrim ka reaguar në lidhje me situatën e krijuar ditën e sotme në Kuvend, ku Partia Demokratike u largua nga salla dhe së bashku me ta edhe ish-kryeministri Sali Berisha.
Duket se ‘Mollë sherri’ për këtë u bë Lëvizja Socialiste për Integrim, e cila pas prezantimit të emrave të kryetarëve, nënkryetarëve dhe anëtarëve të komisioneve parlamentare nga PD dhe PS, kërkoi më shumë kohë që dhe ajo të paraqiste emrat e saj për përfaqësuesit në këto komisione.
“Të dashur kolegë! Një sqarim lidhur me situatën e krijuar në seancën e sotme. Shërbimi i Seancave në Kuvendin e Shqipërisë nuk ka lajmëruar asnjë nga deputetët e LSI, në mënyrë që të bëjnë propozimet e tyre në lidhje me pjesëmarrjen në komisionet parlamentare. Kryetarja e Kuvendit, Lindita Nikolla pranoi kërkesën e LSI dhe për këtë arsye miratimi i përbërjes së komisioneve parlamentare u shty për në seancën tjetër.”, reagimi i LSI-së.
Kujtojmë se nënkryetari i LSI-së, Petrit Vasili deklaroi në Kuvend se LSI-ja nuk është njoftuar nga Kuvendi për të thënë praninë dhe preferencën në komisione.
PD dhe PS ranë dakord me Vasilin duke kërkuar edhe kohë që LSI të mund të bënte propozimet. Nga ana tjetër Balla kërkoi që emocionet të lihen jashtë Kuvendit, por menjëherë erdhi reagimi me tone të ashpra nga lideri demokrat, Lulzim Basha.
Ky i fundit akuzoi edhe Lindita Nikollën për thyerje të rregullores ndërkohë që PD dhe aleatët bojkotuan votimin. PS dhe LSI nga ana tjetër qëndruan në sallë.
