Deputetët e opozitës kanë zhvilluar sot mbledhjen e radhës, ku është diskutuar lidhur me aksionin opozitar në komisione, ashtu edhe në seancat plenare.
Detajet i dhanë para kamerave deputetët, Gazment Bardhi dhe Flamur Noka, duke zbuluar planin e opozitës për javët në vazhdim.
Bardhi u shpreh para gazetarëve, se mbledhja e Komisionit të Reformës Zgjedhore që pritet të mbahet ditën e premte, është një farsë e qeverisë.
“Kuvendi ka një traditë të funksionimit të këtij komisioni. Opozita dhe mazhoranca jo thjesht duhet të kenë numra të barabartë por vullneti i njërës palë nuk mund t’i mbivendoset palës tjetër. Vijimi i farsës duke ripërsëritur kërpëratat e 2020 në një reformë të njëanshme zgjedhore të paralajmëruar për të premten është një tjetër fasadë të atyre që për 22 muaj bllokuan reformën zgjedhore duke i mundësuar Edi Ramës zgjedhjet e 14 majit me të njëjtat problematika”, tha ai.
Ndërsa, deputeti Noka tha se kryefjala e diskutimit në këtë mbledhje ishte intensifikimi i aksionit opozitar parlamentar, ndërsa theksoi po ashtu se shqiptarët sot kanë një parlament të vërtetë dhe ai është tek Rruga e ‘Shpresës’.
“Në çdo mbledhje ne diskutojmë aksionin tonë, çështja e bashkimit është e mbyllur, nuk diskutohet më si çështje. Ne vijojmë fazën e fundit që do jetë fuzioni i plotë i partisë. Aksioni ka nisur ashtu siç e kemi thënë. Shqiptarët e kanë një Parlament real dhe ai është te Rruga e ‘Shpresës’. U trajtuan format se si mosbindja civile duhet të përkthehet në mënyrë më të gjerë”, u shpreh Noka.
