Në mbledhjen e Këshillit Kombëtar të Integrimit Europian (KKIE), deputetja e Partisë Demokratike, Jorida Tabaku, theksoi rëndësinë e procesit të Berlinit dhe sfidat që Shqipëria duhet të përballojë për të avancuar në integrimin europian. Ajo e përshkroi procesin e Berlinit si një urë bashkëpunimi që nuk ka vetëm aspektin e zhvillimit infrastrukturor, por edhe fuqizimin e institucioneve demokratike.
Tabaku vuri në dukje se lëvizja në rajon me karta identiteti është një lehtësim i rëndësishëm, por theksoi sfidat e zbatimit të saj, përfshirë luftën kundër terrorizmit dhe krimit të organizuar. Ajo kritikoi ashpër gjendjen aktuale të policisë shqiptare, duke e cilësuar atë si të lidhur me krimin e organizuar dhe të paaftë për të parandaluar korrupsionin dhe trafikun e drogës.
“Policia e shtetit duhet të ishte në pararojën e betejës ndaj sfidave të reja si terrorizmi apo sulmet kibernetike, por fatkeqësisht, lidhjet mes krimit të organizuar dhe policisë vazhdojnë të mbeten të forta dhe pashkëputura,” tha Tabaku. Ajo shtoi se aksionet e SPAK kanë treguar se drejtues të lartë të policisë kanë pasur kontakte të papërshtatshme përmes platformave të enkriptuara me figura të rëndësishme të botës së krimit.
Tabaku gjithashtu përmendi rastin e Dibrës, ku drejtues të policisë bashkërendonin me persona me precedentë penalë për blerjen e votave, duke theksuar se ky ishte një nga prioritetet e Bundestagut dhe një dëshmi e problemeve të thella të integritetit brenda forcave të rendit. “Një situatë e tillë ka krijuar perceptimin, e drejtë, që policia jo vetëm që nuk është një nga hallkat parandaluese të korrupsionit, por fatkeqësisht në disa raste tejet specifike është kthyer në një krah në shërbim të krimit të organizuar,” tha ajo.
Ajo përfundoi duke theksuar rëndësinë e bashkëpunimit të fortë me partnerët ndërkombëtarë dhe kërkoi masa konkrete për të përmirësuar situatën dhe për të avancuar në rrugën drejt integrimit europian. “Pa një polici të fortë dhe të pavarur, Shqipëria nuk mund të përmbushë standardet e kërkuara për anëtarësimin në Bashkimin Europian,” përfundoi Tabaku.
