Në një deklaratë të mbajtur nën shiun e rrëmbyeshëm përpara Downing Street, Kryeministri britanik Rishi Sunak ka bërë të ditur se ka thirrur zgjedhje të përgjithshme për datën 4 korrik, duke deklaruar se “tani është momenti që Britania të zgjedhë të ardhmen e saj”. Ky vendim vjen pasi Sunak u takua me Mbretin për të kërkuar shpërndarjen e Parlamentit, një kërkesë që u pranua menjëherë.
Ky hap i papritur është parë si një lëvizje e madhe strategjike, veçanërisht në dritën e sondazheve të fundit që tregojnë një epërsi të konsiderueshme për laburistët, me rreth 20 pikë përparësi. Lëvizja vjen gjithashtu pas raporteve zyrtare që tregojnë se inflacioni ka rënë në 2.3% në prill, një zhvillim që Sunak e interpreton si “dëshmi se plani dhe prioritetet që unë përcaktova po funksionojnë”.
“Tani është momenti që Britania të zgjedhë të ardhmen e saj dhe të vendosë nëse duam të ndërtojmë përparimin që kemi bërë ose rrezikojmë të kthehemi në fillim. Pa plan dhe pa siguri,” u shpreh Sunak, duke kujtuar edhe ditët e tij si kancelar gjatë pandemisë, kur tha se i shërbeu vendit ndërsa “e ardhmja varej në balancë”.
Sunak vazhdoi të theksojë rëndësinë e stabilitetit ekonomik, duke e cilësuar atë si “baza e çdo suksesi të ardhshëm, qoftë rritja e pagave dhe punët e mira, investimet në shërbimet tona publike apo mbrojtja e vendit.”
Kryeministri kishte thënë më parë se zgjedhjet do të ndodhin në “gjysmën e dytë të vitit”, por kishte ngurruar të përcaktojë një datë të saktë. Gjithsesi, spekulimet për një datë zgjedhjesh u përforcuan kur ministrat e kabinetit u thirrën në një takim të jashtëzakonshëm të mërkurën, një veprim që solli ndërprerjen e udhëtimeve të shkurtra jashtë vendit nga Sekretari i Mbrojtjes Grant Shapps dhe Sekretari i Jashtëm Lord Cameron për të marrë pjesë.
Sipas rregullave parlamentare, duhet të kalojnë 25 ditë pune nga shpërndarja e parlamentit deri në ditën e votimit. Përderisa zgjedhjet e përgjithshme duhet të mbahen çdo pesë vjet, dita e fundit që mund të mbaheshin zgjedhjet ishte 28 janari 2025.
Që nga zgjedhjet e fundit të përgjithshme në vitin 2019, kur Boris Johnson i siguroi konservatorëve një fitore të thellë ndaj Partisë Laburiste të Jeremy Corbyn, Britania ka pasur dy kryeministra të tjerë, Liz Truss dhe z. Sunak, dhe shumica prej 80 vendesh e konservatorëve është zvogëluar. Këto zgjedhje pritet të jetë një moment vendimtar për të ardhmen politike të Britanisë së Madhe.
