Pesë anëtarë të stafit të Al Jazeera-s, dy gazetarë dhe tre kameramanë, u vranë në një sulm në qytetin e Gazës, të cilin televizioni satelitor e ka cilësuar si një goditje të synuar nga ushtria izraelite ndaj një tende ku strehoheshin gazetarë.
Mes viktimave ishte edhe korrespondenti i njohur Anas al-Sharif. Al Jazeera e dënoi ashpër atë që e quajti “vrasje të qëllimshme” nga Izraeli, duke e konsideruar aktin si një përpjekje të dëshpëruar për të heshtur zërat që raportojnë mbi pushtimin dhe ofensivën ndaj Gazës.
Mouin Rabbani, bashkëredaktor i platformës Jadaliyya, kritikoi ashpër sulmin, duke theksuar se ushtria izraelite nuk ka ofruar asnjë provë për akuzat se al-Sharif ishte pjesëtar i Hamasit. Sipas tij, gjatë konfliktit aktual në Gaza janë vrarë më shumë gazetarë se në çdo luftë tjetër të dokumentuar ndonjëherë, ndërsa në këtë rast specifik, viktimat e dinin se ishin në shënjestër.
“U kërcënuan jo që të ndalonin sulmet me raketa – sepse nuk ishin luftëtarë, por që të braktisnin punën e tyre gazetare,” tha Rabbani, duke shtuar se ata vazhduan me guxim të informonin botën për realitetin në Gaza. Ai i quajti akuzat izraelite “gënjeshtra të fabrikuara”, duke përmendur si shembull një dokument që pretendonte se al-Sharif ishte plagosur gjatë një stërvitjeje ushtarake në korrik 2023 dhe se nuk ishte më i aftë për shërbim, gjë që sipas tij përgënjeshtron çdo lidhje me krahun ushtarak të Hamasit.
Vrasja e pesë gazetarëve është dënuar edhe nga zyrtarë palestinezë dhe organizata për mbrojtjen e lirisë së shtypit, përfshirë Komitetin për Mbrojtjen e Gazetarëve, i cili kërkon që autorët të mbahen përgjegjës.
Një zëdhënës i Sekretarit të Përgjithshëm të OKB-së, Antonio Guterres, i përcolli ngushëllime rrjetit Al Jazeera, ndërsa Klubi Kombëtar i Shtypit në SHBA shprehu “trishtim” dhe “shqetësim” për këtë ngjarje.
Ndërkohë, pavarësisht kritikave ndërkombëtare, Izraeli po vazhdon operacionin e tij ushtarak në Gaza. Në këtë klimë tensioni, kryeministri australian Anthony Albanese njoftoi se Australia do të votojë në Asamblenë e Përgjithshme të OKB-së në shtator për njohjen e shtetit palestinez.
“Derisa të ekzistojnë një shtet izraelit dhe një shtet palestinez,” deklaroi ai, “paqja do të mbetet e përkohshme. Australia njeh të drejtën e popullit palestinez për shtetësinë.”
